జెన్‌కోకు 75 వేలు.. యాదాద్రికి 16వేల టన్నుల బొగ్గు

• సింగరేణి, జెన్‌కో సమన్వయ సమావేశంలో నిర్ణయం

హైదరాబాద్‌, నవంబర్‌ 10 (నమస్తే తెలంగాణ) : ఎల్‌ నినో ప్రభావంతో రాష్ట్రంలో విద్యుత్తు అవసరాలు మరింత పెరిగే అవకాశమున్న నేపథ్యంలో బొగ్గు సరఫరాపై టీజీ జెన్‌కో, సింగరేణిలు దృష్టిసారించాయి. ఇందుకు సంబంధించి జెన్‌కోకు రోజుకు 75 వేల టన్నులు, యాదాద్రి థర్మల్‌ పవర్‌ స్టేషన్‌కు రోజుకు 16 వేల టన్నుల బొగ్గు సరఫరా చేసేందుకు ఇరు సంస్థలు అంగీకార ఒప్పందాన్ని కుదుర్చుకున్నాయి. సింగరేణి భవన్‌ నుంచి సీఎండీ డాక్టర్‌ బుద్ధప్రకాశ్‌ జ్యోతి, జెన్‌కో సీఎండీ డాక్టర్‌ ఎస్‌ హరీశ్‌ వీడియోకాన్ఫరెన్స్‌ ద్వారా ఈ సమావేశంలో పాల్గొన్నారు.

ఈ సందర్భంగా తెలంగాణ జెన్‌కోకు అధికంగా బొగ్గు సరఫరాను పెంచాలని ఇరు సంస్థల అధికారులు నిర్ణయానికి వచ్చారు. ఈ సందర్భంగా బుద్ధప్రకాశ్‌ జ్యోతి మాట్లాడుతూ.. నైనీ గని నుంచి రోజుకు 20 వేల టన్నుల బొగ్గు ఉత్పత్తి లక్ష్యంగా పెట్టుకున్నామని, ఈ నెలాఖరుకు నుంచి రోజుకు 16 వేల టన్నుల బొగ్గును నైనీ గని నుంచి రవాణా చేసేందుకు ప్రణాళికలు సిద్ధం చేశామన్నారు. ప్రతి రోజూ నైనీ బొగ్గు రవాణా విషయంలో తెలంగాణ జెన్‌కో అధికారులతో సమన్వయం చేసుకోవాలని అధికారులకు స్పష్టంచేశారు.