‘గ్రామీణ వైద్యులకు చట్టబద్ధత కల్పించే వరకు పోరాటం’

– ఆర్ఎంపీలకు ప్రభుత్వం ఇచ్చిన హామీలను అమలు చేయాలి
– మహిళా గ్రామీణ వైద్యుల సమావేశంలో ఖ‌మ్మం జిల్లా అధ్యక్షుడు పిట్టల నాగేశ్వరరావు

కారేపల్లి, నవంబర్ 12 : గ్రామీణ వైద్యులు ప్రాథమిక వైద్యం మాత్రమే అందిస్తూ ప్రజల మన్ననలు పొందాలని గ్రామీణ వైద్యుల సంక్షేమ సంఘం ఖమ్మం జిల్లా అధ్యక్షుడు పిట్టల నాగేశ్వరరావు అన్నారు. గురువారం ఖమ్మం పట్టణంలోని సంఘం జిల్లా కార్యాలయంలో ఉమ్మడి ఖమ్మం, వరంగల్ జిల్లాల మహిళా గ్రామీణ వైద్యుల సమావేశం నిర్వహించారు. ఈ సమావేశానికి ఆయన ముఖ్య అతిథిగా హాజరై మాట్లాడారు. కాంగ్రెస్ ప్రభుత్వం ఎన్నికల మేనిఫెస్టోలో ఇచ్చిన హామీ మేరకు గ్రామీణ వైద్యులకు గుర్తింపు కల్పించి, గ్రామీణ ప్రాంతాల్లో ప్రాథమిక వైద్యం అందించేందుకు అవసరమైన సర్టిఫికెట్లు మంజూరు చేయాలని కోరారు. మారుమూల గ్రామాల్లో ప్రజలకు అందుబాటులో ఉంటూ అత్యవసర సమయాల్లో ప్రథమ చికిత్స అందిస్తున్న గ్రామీణ వైద్యుల సేవలను ప్రభుత్వం గుర్తించాలని అన్నారు. ఇటీవల ఎన్‌ఎంసీ పేరుతో కొందరు వైద్యులు గ్రామీణ వైద్యులు వైద్యం చేయకూడదంటూ అభ్యంతరాలు వ్యక్తం చేయడం, వారి వైద్య కేంద్రాల వద్ద తనిఖీలు నిర్వహించి వివరాలు నమోదు చేయడం ఆందోళనకరమన్నారు. గ్రామీణ ప్రాంతాల్లో వైద్య సేవలు అందుబాటులో లేని సందర్భాల్లో ప్రజలకు ప్రాథమిక చికిత్స అందిస్తున్న గ్రామీణ వైద్యులపై వేధింపులు,దాడులు నిలిపివేయాలని డిమాండ్ చేశారు.

‘గ్రామీణ వైద్యులకు చట్టబద్ధత కల్పించే వరకు పోరాటం’

గ్రామీణ వైద్యులు కూడా తమ పరిధిని దాటి వైద్యం చేయకుండా, ప్రాథమిక చికిత్స అందించి అవసరమైన సందర్భాల్లో రోగులను ఉన్నత వైద్య కేంద్రాలకు పంపించాలని సూచించారు. ప్రభుత్వం గ్రామీణ వైద్యులకు చట్టబద్ధమైన గుర్తింపు కల్పించి, వారి సేవలకు రక్షణ కల్పించాలని కోరారు. ఇచ్చిన హామీలను అమలు చేయకపోతే రాష్ట్ర వ్యాప్తంగా ఉద్యమాన్ని చేపట్టేందుకు వెనుకాడబోమని స్పష్టం చేశారు. ఈ సందర్భంగా మహిళా గ్రామీణ వైద్యులకు ప్రాథమిక వైద్యంపై వివిధ విభాగాల్లో శిక్షణ కార్యక్రమం నిర్వహించారు. రోగులకు ప్రథమ చికిత్స అందించే విధానం, వైద్య సేవల్లో తీసుకోవాల్సిన జాగ్రత్తలు, బాధ్యతాయుతంగా వ్యవహరించాల్సిన అంశాలపై అవగాహన కల్పించారు. ఈ కార్యక్రమంలో సంఘం జిల్లా ప్రధాన కార్యదర్శి అనంతారపు వెంకటాచారి, జిల్లా ఉపాధ్యక్షులు నెమలికొండ మణికుమార్, కనకం బాబు, మహిళా జిల్లా నాయకురాలు కొండ్ర మధుప్రియ, ఎం. శ్రీదేవి, ఎన్. పార్వతి, ఏ.జయమణి, డి.సంధ్యారాణి, యు.లక్ష్మి, ఈ.రామేశ్వరి, శ్రీలక్ష్మి, ఎన్. నాగమణి, కె.సుజాత, ఏ.అంజలి, సీహెచ్.అనిత, భాగ్యలక్ష్మి, ఏ.ఉష, బి.సుశీల పాల్గొన్నారు.