ఖైరతాబాద్‌ కాంగ్రెస్‌ ఖాళీ

22 November 2026 - 06:30
0 0
ఖైరతాబాద్‌ కాంగ్రెస్‌ ఖాళీ
Harishrao
  • పార్టీ వీడుతున్న దానం ప్రధాన అనుచరులు

ఖైరతాబాద్‌ నియోజకవర్గంలో దానం నాగేందర్‌ను ప్రధాన అనుచరులు ఒక్కొక్కరుగా వీడుతున్నారు. బీఆర్‌ఎస్‌లో ఎమ్మెల్యేగా గెలిచి కాంగ్రెస్‌కు ఫిరాయించిన దానం నాగేందర్‌పై తెలంగాణ హైకోర్టు అనర్హుడిగా ప్రకటించింది. బీఆర్‌ఎస్‌ను వీడినప్పటి నుంచే నియోజకవర్గంలో దానంపై వ్యతిరేకత మొదలైంది. అనర్హత ప్రకటన వెలువడినప్పటి నుంచి దానం అనుచరుల నుంచి వ్యతిరేక పవనాలు వీస్తున్నాయి. దీనికి తోడు కాంగ్రెస్‌ ప్రభుత్వంపై వ్యతిరేకత రోజురోజుకు పెరుగుతుండటంతో ఖైరతాబాద్‌లోని దానం నాగేందర్‌ క్యాడర్‌ క్రమక్రమంగా బీఆర్‌ఎస్‌ వైపు చూస్తున్నది. తాజాగా దానం నాగేందర్‌ ప్రధాన అనుచరుడైన వైలా ప్రవీణ్‌ కాంగ్రెస్‌ను వీడి బీఆర్‌ఎస్‌ఎల్పీ డిప్యూటీ ఫ్లోర్‌ లీడర్‌ హరీశ్‌ రావు సమక్షంలో గులాబీ కండువా కప్పుకొన్నారు. ఆయనతో పాటు పెద్ద సంఖ్యలో కాంగ్రెస్‌ కార్యకర్తలు బీఆర్‌ఎస్‌లో చేరారు. మరికొంత మంది కాంగ్రెస్‌ నేతలు కూడా ఇదే బాటలో పయనించేందుకు ప్రయత్నాలు చేస్తున్నారు. తాజా పరిణామాలతో ఖైరతాబాద్‌లో దానం నాగేందర్‌ క్యాడర్‌ మొత్తం ఖాళీ అవుతుందని చర్చ జరుగుతున్నది. కాంగ్రెస్‌ పాలనపై నియోజకవర్గ ప్రజల్లో వ్యతిరేకత వస్తుండటంతో కాంగ్రెస్‌ క్యాడర్‌ బీఆర్‌ఎస్‌ వైపు చూస్తున్నది.

బడే భాయ్‌ మోదీ.. చోటే భాయ్‌ రేవంత్‌ బంధానికి తెలంగాణ బలి అవుతున్నది. పక్క రాష్ట్రమైన ఏపీకి కరువు నిధుల వరద పారిస్తున్న కేంద్ర ప్రభుత్వం.. మన రాష్ర్టానికి మాత్రం మొండిచెయ్యి చూపుతున్నది. సమ్మిట్‌ల పేరిట గోబెల్స్‌ ప్రచారం తప్ప ఉద్ధరించిందేమీలేదు.

ఎమ్మెల్యేల ధిక్కార స్వరంతో రేవంత్‌రెడ్డి నియంత్రణ కోల్పోయి మాట్లాడుతున్నడు. కాంగ్రెస్‌ ఎమ్మెల్యేలకు పిచ్చికుక్క కరిచిందని.. వాళ్లను తీసుకపోయి ఎర్రగడ్డ దవాఖానలో వేయాలంటున్నడు. కానీ పిచ్చి ముదిరిపోయి నోటికొచ్చినట్టు మాట్లాడుతున్న రేవంత్‌రెడ్డినే ఎర్రగడ్డ దవాఖానల వేయాలి.

కేసీఆర్‌ రాకముందు 26 లక్షల మందికి పింఛన్లు ఇచ్చేది. కానీ కేసీఆర్‌ 17 లక్షల కొత్త పింఛన్లు ఇచ్చి 43 లక్షలకు పెంచారు. రేవంత్‌రెడ్డి మూడేండ్లలో 4 లక్షల పింఛన్లు తీసేసి 4లక్షలు కొత్తవి ఇచ్చిండు. అంటే మొత్తంగా ఇచ్చింది గుండు సున్నా. చివరికి అవ్వా తాతలను మోసం చేసిన ఘనత ఆయనకే దక్కింది.

Hyd

సిటీబ్యూరో, నవంబర్‌ 21 (నమస్తే తెలంగాణ): ఉప ఎన్నికలు అనివార్యం అని తేలడంతో ఖైరతాబాద్‌ నియోజకవర్గంలో రాజకీయ పరిణామాలు వేగంగా మారుతున్నాయి. మంత్రి పదవి వస్తుందనే ఆశతో నియోజకవర్గాన్ని అభివృద్ధి చేయొచ్చనే నెపంతో కాంగ్రెస్‌లో చేరిన దానం నాగేందర్‌పై అనర్హత వేటు పడినప్పటి నుంచి ప్రజల్లో తీవ్ర వ్యతిరేకత మొదలైంది. ఈ క్రమంలో నియోజకవర్గ కాంగ్రెస్‌ నుంచి వలసల వేగం పెరుగుతున్నది. దానం నాగేందర్‌కు అత్యంత సన్నిహితుడిగా పేరున్న ఖైరతాబాద్‌ డివిజన్‌కు చెందిన సీనియర్‌ నేత వైలా ప్రవీణ్‌ శనివారం బీఆర్‌ఎస్‌లో చేరడంతో పాటు ఆయన వెంట భారీ సంఖ్యలో కాంగ్రెస్‌ కార్యకర్తలు పార్టీలో చేరారు. దీంతో మాజీ ఎమ్మెల్యే దానం నాగేందర్‌కు భారీ షాక్‌ తగిలిందని నియోజకవర్గంలో చర్చ జరుగుతోంది.

మాజీ ఎమ్మెల్యే దానం నాగేందర్‌కు ప్రధాన అనుచరుడిగా సుమారు 30 ఏండ్ల నుంచి పనిచేస్తున్న వైలా ప్రవీణ్‌తో పాటు ఖైరతాబాద్‌, సోమాజిగూడ, హిమాయత్‌నగర్‌, బంజారాహిల్స్‌ డివిజన్ల పరిధిలోని మరికొందరు కూడా కాంగ్రెస్‌ను వీడేందుకు ప్రయత్నాలు చేస్తున్నట్లు తెలుస్తున్నది. ఇప్పటికే వీరంతా మాజీ మంత్రి తలసాని శ్రీనివాస్‌యాదవ్‌ ద్వారా బీఆర్‌ఎస్‌ నేతలతో చర్చలు జరపడంతో పాటు ఉప ఎన్నికలకు ముందుగానే కాంగ్రెస్‌కు గుడ్‌బై చెప్పేందుకు ఏర్పాట్లు చేసుకుంటున్నారని సమాచారం.

మూడేండ్లుగా క్యాడర్‌లో అసంతృప్తి
ఎమ్మెల్యేగా మూడేండ్లుగా పనిచేసినా..నియోజకవర్గంలో అభివృద్ధి పనులు చేపట్టలేకపోయారనే అపవాదును మూటగట్టుకున్నారు. దానం నాగేందర్‌ ఏమీ చేయకుండా రేవంత్‌రెడ్డి భజన చేస్తున్నాడని పలువురు కాంగ్రెస్‌ నేతలు బహిరంగంగానే వ్యాఖ్యానిస్తున్నారు. కాంగ్రెస్‌ నుంచి బీఆర్‌ఎస్‌లోకి వెళితేనే తమ రాజకీయ జీవితాలు నిలబడతాయని భావిస్తున్నట్లు చర్చ జరుగుతున్నది. మునిగిపోయే పడవ లాంటి దానంను నమ్ముకుంటే తాము కూడా మునగడం ఖాయమని సీనియర్‌ నేతలు అంతర్గతంగా చర్చించుకుంటున్నారు. దానం నాగేందర్‌ తన స్వార్థం కోసం కార్యకర్తలను, నాయకులను వాడుకుంటారని పలువురు మండిపడుతున్నారు. నియోజకవర్గంలో మరోసారి దానం నాగేందర్‌ను ఓటర్లు, కాంగ్రెస్‌ నాయకులు నమ్మే పరిస్థితి లేదని బహిరంగంగానే మాట్లాడుకుంటున్నారు. ఈ నేపథ్యంలో దానం అనుచరగణంలో తీవ్రమైన అసంతృప్తి ఉందన్న చర్చ జరుగుతున్నది. అందుకే బీఆర్‌ఎస్‌లోకి వెళ్లడమే మంచిదని దానం క్యాడర్‌ భావిస్తున్నట్లు సమాచారం.

Hyd2

భారీ ర్యాలీగా భవన్‌కు..
ఖైరతాబాద్‌, నవంబర్‌ 21: కాంగ్రెస్‌ పాలనపై అసంతృప్తితో పాటు దానం తీరుతో తీవ్ర ఆగ్రహంగా ఉన్న కాంగ్రెస్‌ సీనియర్‌ నాయకులు, కార్యకర్తలు పెద్ద ఎత్తున బీఆర్‌ఎస్‌లో చేరారు. అంతకుముందు దానం అనుచరులు, కాంగ్రెస్‌ నాయకులు, కార్యకర్తలు శనివారం ఖైరతాబాద్‌ లైబ్రరీ చౌరస్తాకు చేరుకొని బీఆర్‌ఎస్‌ జెండాలు చేతబూని జై తెలంగాణ నినాదాలతో హోరెత్తించారు. దానం ప్రధాన అనుచరుడిగా పేరున్న వైలా ప్రవీణ్‌ ఆధ్వర్యంలో వందలాది మంది కార్యకర్తలు ర్యాలీగా తెలంగాణ భవన్‌కు తరలారు. ఎమ్మెల్యే తలసాని, ఎమ్మెల్సీ దాసోజు శ్రవణ్‌లు ముఖ్య అతిథిగా హాజరై ర్యాలీలను ప్రారంభించారు.

ఖైరతాబాద్‌ చౌరస్తా నుంచి ప్రారంభమైన ర్యాలీ..తెలంగాణ భవన్‌ వరకు సాగింది. సోమాజిగూడ డివిజన్‌కు చెందిన కాంగ్రెస్‌ యువ నాయకుడు శ్రీనాథ్‌ ముదిరాజ్‌ ఆధ్వర్యంలో వందలాది మంది యువకులు బీఆర్‌ఎస్‌లో చేరేందుకు కదం తొక్కారు. ఈ సందర్భ ంగా వారు మాట్లాడుతూ ఉద్యమనేత, తొలి సీఎం కేసీఆర్‌ రాష్ర్టాన్ని అభివృద్ధి పథంలో నడిపించారన్నారు. తెలంగాణ ఏర్పడిన పదేండ్లలోపే దేశంలోనే నంబర్‌ 1 రాష్ట్రంగా తీర్చిదిద్దిన ఘనత బీఆర్‌ఎస్‌ ప్రభుత్వానికే దక్కుతుందన్నారు. బూటకపు మాటలు, అబద్ధపు హామీలతో గద్దెనెక్కిన కాంగ్రెస్‌ పాలనలో రాష్ట్రం అన్ని రంగాల్లో వెనుకబడి పోతున్నదని ఆవేదన వ్యక్తం చేశారు.

Comments (0)

User