ఏపీ జలకుట్రలపై యుద్ధం

22 November 2026 - 06:30
0 0
ఏపీ జలకుట్రలపై యుద్ధం
Jagadish
  • త్వరలో సాగర్‌కు బీఆర్‌ఎస్‌ బృందం
  • ఇన్‌టేక్‌ వెల్‌, నిర్మాణాలను పరిశీలిస్తం
  • శ్రీశైలం మాదిరే సాగర్‌కు ఆంధ్రా కన్నం
  • ఇంత జరుగుతున్నా సోయి లేని సీఎం
  • 8 నెలలుగా కన్నెత్తి చూడని సర్కార్‌
  • ఆంధ్రా కనుసన్నుల్లో తెలంగాణ ఇరిగేషన్‌
  • రాష్ట్ర ప్రభుత్వంపై జగదీశ్‌రెడ్డి ధ్వజం

నల్లగొండ ప్రతినిధి, నవంబర్‌ 21 (నమస్తే తెలంగాణ) : శ్రీశైలం మాదిరిగా నాగార్జునసాగర్‌ జలాలకు గండికొట్టే ఏపీ కుట్రలపై బీఆర్‌ఎస్‌ యుద్ధం చేస్తుందని మాజీ మంత్రి, సూ ర్యాపేట ఎమ్మెల్యే జగదీశ్‌రెడ్డి హెచ్చరించారు. తాగునీటి పేరుతో సాగర్‌ అంచున ఏపీ సర్కార్‌ అక్రమంగా నిర్మిస్తున్న ఇన్‌టేక్‌వెల్‌తోపాటు ఇతర భారీ నిర్మాణాలను రెండుమూడు రోజు ల్లో ఉమ్మడి నల్లగొండ జిల్లా నేతలతో కలిసి తాను సందర్శిస్తానని వెల్లడించారు. శనివారం నల్లగొండలోని బీఆర్‌ఎస్‌ జిల్లా కార్యాలయంలో జడ్పీ మాజీ చైర్మన్‌ బండా నరేందర్‌రెడ్డి, మాజీ ఎమ్మెల్యే కంచర్ల భూపాల్‌రెడ్డితో కలిసి ఆయన మీడియాతో మాట్లాడారు.

ఎనిమిది నెలలుగా సాగర్‌ మధ్యలో నుంచి నీటిని తరలించే పనులు జరుగుతున్నా కాంగ్రెస్‌ సర్కార్‌కు చీమకుట్టినట్టు కూడా ఎందుకు లేదని ప్రశ్నించారు. చంద్రబాబు కనుసన్నుల్లో పనిచేసే సీఎం రేవంత్‌రెడ్డికి సోయి లేకపోయినా జిల్లా ఇరిగేషన్‌ శాఖ మంత్రి ఉత్తమ్‌కుమార్‌రెడ్డికి లేదా మరో మంత్రి కోమటిరెడ్డి వెంకట్‌రెడ్డికి ఎందుకు పట్టడం లేదని ప్రశ్నించారు. బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ ప్రశ్నించేదాకా ప్రభుత్వంలో కదలిక లేకపోవడం సిగ్గుచేటని మండిపడ్డారు.

ఇద్దరు మంత్రుల్లోనూ ఉత్తమ్‌ తమకు తెలుసని అంటుంటే కోమటిరెడ్డి మాత్రం తమకు ఎందుకు చెప్పలేదని ఈఈని తిట్టామనడం చూస్తుంటే.. వీళ్ల చిత్తశుద్ధి ఏపాటిదో తెలుస్తున్నదని ఎద్దేవా చేశారు. ఇరిగేషన్‌ శాఖలో సలహాదారు సహా ఈఎన్సీ, ఇతర కీలక అధికారులంతా ఆంధ్రావాళ్లే ఉండటం ఏమిటని ప్రశ్నించారు. వాళ్లు ప్రభుత్వానికి ఏం సలహా ఇస్తారు.. కేఆర్‌ఎంబీ మీటింగ్స్‌లో తెలంగాణ ప్రయోజనాల కోసం ఎలా మాట్లాడగలరో మంత్రులు సమాధానం చెప్పాలని డిమాండ్‌ చేశారు. కేంద్రంలో మోదీ, ఏపీలో చంద్రబాబు, రాష్ట్రంలో వారి అనుచరుడే సీఎం కావడం వల్ల గోదావరి, కృష్ణా నీళ్లన్నీ ఆంధ్రాకే ధారాదత్తం చేస్తున్నారని విమర్శించారు.

పక్కనే ఉన్న నల్లగొండ, మహబూబ్‌నగర్‌ జిల్లాలకు పారని కృష్ణా నీళ్లు ఎక్కడో 800 కిలోమీటర్ల దూరంలో కుప్పానికి తరలిపోతుంటే తెలంగాణ సర్కార్‌కు సిగ్గులేదా అని తూర్పారబట్టారు. దీన్ని ఆపేందుకు తీసుకున్న చర్యలేమిటో మంత్రి ఉత్తమ్‌ బహిర్గతం చేయాలని జగదీశ్‌రెడ్డి డిమాండ్‌ చేశారు. ఈ సీజన్‌లో ఇప్పటికే ఏపీ సర్కార్‌ పరిమితికి మించి కృష్ణా నీళ్లను తరలించుకుపోయిందని, సాగర్‌లో ఉన్న నీళ్లన్నీ తెలంగాణకు చెందేలా ప్రభుత్వం చర్యలు చేపట్టాలన్నారు. ఏఎంఆర్పీ కాల్వల ద్వారా తక్షణమే చెరువులు, కుంటలన్నీ నింపాలని డిమాండ్‌ చేశారు. ఇప్పటికైనా జిల్లా మంత్రు లు మేల్కోవాలని హితవు పలికారు. సమావేశంలో మున్సిపల్‌ మాజీ చైర్మన్‌ మందడి సైదిరెడ్డి, పార్టీ నేతలు అభిమన్యు శ్రీనివాస్‌, బోనగిరి దేవేందర్‌, దొడ్డి రమేశ్‌, ఐతగోని యాదయ్య, బొజ్జ వెంకన్న, బొమ్మరబోయిన నాగార్జున, రావుల శ్రీనివాస్‌రెడ్డి, జమాలుద్దీన్‌ ఉన్నారు.

Comments (0)

User