మంచిర్యాలను కమ్మేసిన పొగమంచు.. తెల్లవారుజామున కనువిందు చేసిన ప్రకృతి అందాలు!

మంచిర్యాల అర్బన్, 22: మంచిర్యాల జిల్లా కేంద్రాన్ని ఆదివారం తెల్లవారుజామున దట్టమైన పొగమంచు కమ్మేసింది. పట్టణంతో పాటు పరిసర ప్రాంతాల్లో మంచు తెరలు అలుముకోవడంతో రహదారులు, ఖాళీ ప్రదేశాలు కొత్త అందాలను సంతరించుకున్నాయి. ఉదయం వేళ పట్టణమంతా పొగమంచుతో నిండిన దృశ్యాలు స్థానికులను ఆకట్టుకున్నాయి.
దట్టమైన పొగమంచు కారణంగా ఎదురుగా వచ్చే వాహనాలు సైతం స్పష్టంగా కనిపించలేదు. దీంతో వాహనదారులు అప్రమత్తంగా ప్రయాణించాల్సి వచ్చింది. రాకపోకలు సాగించే ప్రయాణికులు కొంత ఇబ్బంది ఎదుర్కొన్నారు.
మరోవైపు పొగమంచుతో కప్పుకున్న రహదారులు, పరిసర ప్రాంతాల అందాలు ప్రకృతి ప్రేమికులను మంత్రముగ్ధులను చేశాయి. ఉదయం వేళ కనిపించిన ఈ దృశ్యాలను పలువురు తమ సెల్ఫోన్లలో ఫొటోలు, వీడియోలు తీసి సోషల్ మీడియాలో స్టేటస్లుగా పెట్టుకున్నారు. చలి వాతావరణానికి తోడు పొగమంచు పట్టణానికి ప్రత్యేక అందాన్ని తీసుకొచ్చింది.
Comments (0)