కేయూలో యథేచ్ఛగా భూముల కబ్జా

• లెక్క తేలని మరో 60 ఎకరాలు

• దర్జాగా కబ్జా చేసి ఇండ్ల నిర్మాణం

• మార్కెట్‌ విలువ రూ.100 కోట్లు

• అధికార పార్టీ పెద్దల ఒత్తిడి..

హనుమకొండ, నవంబర్‌ 11 (నమస్తే తెలంగాణ ప్రతినిధి): కాకతీయ యూనివర్సిటీ భూముల పరిరక్షణ విషయమై రాష్ట్ర ప్రభుత్వం చోద్యం చూస్తున్నది. కబ్జాకు గురైన భూములను స్వాధీనం చేసుకునే విషయంలో మీనమేషాలు లెక్కిస్తున్నది. ఏటా భూములు కబ్జాకు గురవుతున్నా.. ప్రహరీ నిర్మాణాన్ని చేపట్టడంలేదు. అధికార బలం ఉన్న కొందరు వ్యక్తులు యూనివర్సిటీ భూములను కబ్జా చేసి ఇండ్లు కట్టుకున్నారు. రెవెన్యూ, కాకతీయ యూనివర్సిటీ ఉన్నతాధికారులు కలిసి నిర్వహించిన సర్వేలోనూ 60 ఎకరాల భూమి కబ్జాకు గురైనట్టు తేలింది. యూనివర్సిటీ అధికారులు, పోలీసులు, పార్టీ నేతలు యూనివర్సిటీ భూమిని కబ్జా చేసినట్టు సర్వే నివేదికలో పేర్కొన్నారు.

వర్సిటీ భూములను ఆక్రమించిన 76 మందికి గ్రేటర్‌ వరంగల్‌ మున్సిపల్‌ కార్పొరేషన్‌ నోటీసులు జారీ చేసింది. కబ్జాకు గురైన భూముల విలువ రూ.100 కోట్లు ఉంటుందని అంచనా. కబ్జాపై చర్యలు తీసుకోకుండా అధికార పార్టీ ప్రజాప్రతినిధులు అడ్డుపడుతున్నారు. రెండేండ్లుగా ఎలాంటి చర్యలు తీసుకోకపోవడంతో కబ్జాదారులు ధీమాగా ఉంటున్నారు. వర్సిటీ చుట్టూ 10 కిలోమీటర్ల ప్రహరీ నిర్మాణం చేసేందుకు రూ.20 కోట్లు అవసరమవుతాయి. తెలంగాణ రాష్ట్ర ఎడ్యుకేషన్‌ అండ్‌ వెల్ఫేర్‌ ఇన్‌ఫ్రాస్ట్రక్చర్‌ డెవలప్‌మెంట్‌ కార్పొరేషన్‌ (టీజీఈడబ్ల్యూఐడీసీ) ఈ పనులు పూర్తి చేయాల్సి ఉన్నది. ఇదే అదనుగా భూములను కబ్జా చేస్తూనే ఉన్నారు. నిధులు లేకపోవడంతో పనులు చేపట్టేందుకు టీజీఈడబ్ల్యూఐడీసీ ముందుకు రావడంలేదు.

కబ్జా చేసి ఇండ్ల నిర్మాణం

వరంగల్‌లోని కాకతీయ యూనివర్సిటీ 1976లో ఏర్పాటైంది. అప్పుడు యూనివర్సిటీకి 680 ఎకరాలను ప్రభుత్వం అప్పగించింది. కుమార్‌పల్లిలో 188 ఎకరాలు, లషర్‌ సింగారంలో 309.20 ఎకరాలు, పలివేల్పుల శివారులో 175.14 ఎకరాల చొప్పున మొత్తం 680 ఎకరాల భూమి ఉన్నది. 1980లో యూనివర్సిటీ భూముల నుంచి ఎస్సారెస్పీ కాలువ వెళ్లింది. కెనాల్‌ పరిసర ప్రాంతం యూనివర్సిటీకి అవసరమైన భవన నిర్మాణాలకు అనువుగా లేదు. యూనివర్సిటీ వెనుక కాకతీయ కెనాల్‌ వైపు ప్రహరీ నిర్మాణాన్ని యూనివర్సిటీ ఉన్నతాధికారులు పట్టించుకోలేదు. ఇదే అదనుగా పలివేల్పుల, డబ్బాల ఏరియా, ముచ్చర్ల రోడ్డు వైపు యూనివర్సిటీ భూములు కబ్జా అయ్యాయి.

యూనివర్సిటీలోని అధికారులు, పోలీసు అధికారులు, రాజకీయ పార్టీల నేతలు భూములను కబ్జా చేశారు. సర్వే నంబర్లకు స్వల్ప మార్పులు చేసి ఈ భూములకు కాగితాలు సృష్టించారు. భూముల కబ్జాపై ఆరోపణలు పెరుగడంతో 2023లో హనుమకొండ కలెక్టర్‌ డిఫరెన్షియల్‌ గ్లోబల్‌ పొజిషనింగ్‌ సిస్టమ్‌ (డీజీపీఎస్‌) పద్ధతిలో సర్వే చేయించారు. వర్సిటీకి 620 ఎకరాలే ఉన్నట్టు సర్వేలో తేలింది. క్యాంపస్‌లోని 229, 234, 412, 413, 414 సర్వే నంబర్లలోని 60 ఎకరాలు కబ్జా అయినట్టు నిర్ధారించారు. కాకతీయ యూనివర్సిటీ భూముల ఆక్రమణలపై విజిలెన్స్‌ అండ్‌ ఎన్‌ఫోర్స్‌మెంట్‌ అధికారులు సర్వే నిర్వహించారు. సర్వే అండ్‌ ల్యాండ్‌ రికార్డ్స్‌, గ్రేటర్‌ వరంగల్‌ టౌన్‌ ప్లానింగ్‌, కాకతీయ యూనివర్సిటీ డెవలప్‌మెంట్‌ ఆఫీసర్స్‌తో కలిసి విజిలెన్స్‌ అధికారులు సర్వే చేసి వర్సిటీ చుట్టూ ఉన్న కబ్జాలను గుర్తించారు. కుమార్‌పల్లి శివారులోని 229 సర్వే నంబర్‌లో ఆక్రమణలు ఉన్నట్టు నిర్ధారించారు.

వర్సిటీ మాజీ అసిస్టెంట్‌ రిజిస్ట్రార్‌ అశోక్‌బాబు, మరికొందరు ఈ భూముల్లోనే ఇండ్లు కట్టుకున్నారు. వర్సిటీ ఏర్పాటు సమయంలో కుమార్‌పల్లి, లష్కర్‌ సింగారం, పలివేల్పుల పరిధిలోని 680 ఎకరాలు సేకరించారు. పలివేల్పుల శివారు 412, 413, 414వ సర్వే నంబర్‌ భూముల్లో, లష్కర్‌ సింగారం శివారు 34 సర్వే నంబర్‌లో కబ్జాలు ఎక్కువగా ఉన్నాయని తేలింది. కబ్జా భూమిలో అక్రమ నిర్మాణాలు ఉన్నాయి. కబ్జాలపై చర్యలు తీసుకోకపోవడంతో విద్యార్థులు, ప్రొఫెసర్లు ధర్నాలు చేశారు. యూనివర్సిటీ ఉన్నతాధికారులు, రాష్ట్ర ప్రభుత్వంగానీ చర్యలు తీసుకోవడంలేదు.

20 కోట్లు సరిపోక ప్రహరీ కట్టడంలేదు

కాకతీయ యూనివర్సిటీకి 650 ఎకరాలు ఉండాలి. విజిలెన్స్‌ అండ్‌ ఎన్‌ఫోర్స్‌మెంట్‌, రెవెన్యూ, కేయూ అధికారులు కలిసి యూనివర్సిటీ చుట్టూ ఫిజికల్‌ సర్వే చేశారు. రూ.20 కోట్ల యూనివర్సిటీ నిధులతో ప్రహరీ పనులు చేపడుతాం. టీజీఈడబ్ల్యూఐడీసీ పనులు చేయకపోతే యూనివర్సిటీ ఈసీలో పెట్టి మళ్లీ టెండర్‌ పిలువాల్సి ఉంటుంది.
-వల్లూరి రాంచంద్రం, రిజిస్ట్రార్‌

ఆక్రమించినవారిపై చర్యలు తప్పవు

కాకతీయ యూనివర్సిటీ భూములు కబ్జాకు గురయ్యాయి. కొందరు ఆక్రమించి ఇండ్లు కట్టుకున్నారు. ఇంచు భూమిని కూడా వదిలేది లేదు. కబ్జా అయిన భూములను స్వాధీనం చేసుకుంటాం. భూములు కబ్జా చేసినవారిపై పోలీసులకు ఫిర్యాదు చేశాం. వారు చర్యలు తీసుకుంటారు. భూముల రక్షణకు ప్రహరీ నిర్మిస్తాం. ఇందుకోసం 17న సమావేశం నిర్వహిస్తున్నాం.
– వై వెంకయ్య, కేయూ డెవలప్‌మెంట్‌ ఆఫీసర్‌