కరువు కాలంలో ప్రమోషన్ల వివాదం!

• మిషన్‌ భగీరథలో సీనియర్ల ఇంజినీర్లు గరంగరం
• ప్రమోషన్లలో అన్యాయం చేస్తున్నారు
• జూనియర్లకే పెద్దపీట వేస్తున్నారు
• కోర్టు ఆదేశాలను పట్టించుకోని వైనం
• 15 తర్వాత ఆందోళన తప్పదంటున్న సీనియర్‌ ఏఈలు

నాగర్‌కర్నూల్‌, నవంబర్‌ 13: రాష్ట్రంలో కరువు నెలకొన్న నేపథ్యంలో 34 రిజర్వాయర్ల నుంచి తాగునీరు అందించాల్సిన మిషన్‌ భగీరథ శాఖలో ఇప్పుడు పెద్ద కుదుపు ఏర్పడింది. ఒకవైపు ఖాళీలు, మరోవైపు ప్రమోషన్ల వివాదం ఆ శాఖను కుదిపేస్తున్నాయి. సీనియారిటీని తొక్కిపెట్టి జూనియర్లకు ప్రమోషన్లు ఇస్తున్నారన్న ఆరోపణ తారస్థాయికి చేరింది. ఈ సమస్యను తక్షణం పరిష్కరించకపోతే తాగునీటి సరఫరా వ్యవస్థకే ప్రమాదమని ఇంజినీర్లు హెచ్చరిస్తున్నారు. మిషన్‌ భగీరథ పథకంలో పనిచేస్తున్న 2011-2013 బ్యాచ్‌ సీనియర్‌ అసిస్టెంట్‌ ఇంజినీర్ల (ఏఈ)కు ప్రమోషన్లు నిలిచిపోయాయన్నది ప్రధాన ఆరోపణ.

జూనియర్లు అయిన 2016 బ్యాచ్‌ ఏఈఈలు తమ కంటే పైస్థాయికి వెళ్లిపోతున్నారన్నది సీనియర్ల వాదన. జీవో-32 ప్రకారం.. 2022 తర్వాత నియమితులైన ఏఈలను ఆరేండ్ల తర్వాత ఏఈఈగా మార్చి వారికి ప్రమోషన్‌ ఇవ్వాలనే నిబంధన ఉన్నది. దీనిని పాత నిబంధనల ప్రకారం నియమితులైన ఏఈలకు కూడా వర్తింపజేస్తూ, సీనియారిటీ జాబితాలో వారిని వెనక్కు నెట్టడంపై సీనియర్‌ ఏఈలు తీవ్ర అభ్యంతరం వ్యక్తం చేస్తున్నారు. సీనియర్‌ ఏఈ బ్యాచ్‌ల్లో కొందరికి జీవో-32 కంటే ముందే 3:1 నిష్పత్తి ప్రకారం డీఈగా ప్రమోషన్‌ ఇచ్చినట్టు తెలుస్తున్నది. 2022 తర్వాత మిగిలిన ఏఈలకు ప్రమోషన్లు నిరాకరిస్తున్నారని ఆరోపణలు వ్యక్తమవుతున్నాయి.

సీనియారిటీకి నష్టం కలుగొద్దు: కోర్టు

2025లో 19 మంది ఏఈఈలకు డీఈలుగా ప్రమోషన్‌ ఇచ్చారు. వీరిలో ఐదుగురు ఏఈలకు డీఈలుగా ప్రమోషన్‌ ఇవ్వాల్సి ఉన్నా.. కోర్టులో కేసు ఉన్నదని నిరాకరించారనే ఆరోపణలు ఉన్నాయి. జీవో-32 ప్రకారం సీనియర్‌ ఏఈలకు అర్హత లేదని చెప్పి, వారిని తమకంటే జూనియర్‌ అయిన 2016 బ్యాచ్‌కు చెందిన ఏఈఈల కింద చేర్చుతున్నారు. దీంతో సీనియర్‌ ఏఈలకు ప్రమోషన్‌ రాదని ఆందోళన చెందుతున్నారు.

ఈ నేపథ్యంలో సీనియర్‌ ఏఈ పీ మధు కోర్టును ఆశ్రయించగా, జీవో-32 నిబంధనలు భవిష్యత్తు నుంచి మాత్రమే వర్తింపజేయాలని, జీవో-32 కంటే ముందే నియమితులైన వారి సీనియారిటీకి ఎలాంటి నష్టం జరుగకుండా చూడాలని కోర్టు ఆదేశించింది. అయినా కోర్టు ఆదేశాలను భగీరథ శాఖ అమలు చేయడం లేదని సీనియర్లు ఆరోపిస్తున్నారు. దీనిపై ప్రభుత్వం వెంటనే తగిన చర్యలు తీసుకోవాలని ఉద్యోగులు కోరుతున్నారు. ఈ జీవో వివాదం అన్ని స్థాయిల్లో ప్రభావం చూపుతున్నది.

ప్రభుత్వానికి ఇంజినీర్లు వేస్తున్న ప్రశ్నలు

‘కోర్టు చెప్పినవిధంగా జీవో-32ను భవిష్యతు నుంచే ఎందుకు అమలు చేయరు? 2011-2013 బ్యాచ్‌ సీనియర్లను 2016 బ్యాచ్‌ కింద ఎందుకు పెట్టారు? 2025లో 19 మందికి ప్రమోషన్‌ ఇచ్చినప్పుడు మిగిలిన ఐదుగురిని ఎందుకు వదిలేశారు? డీఈ, ఈఈ, ఎస్‌ఈ, సీఈ పోస్టులకు ఇన్‌చార్జులతో ఎన్నాళ్లు నడుపుతారు? కరువు కాలంలో పనిభారం పెంచుతూనే ప్రమోషన్‌ ఎందుకు ఆపుతున్నారు?’ అని ఇంజినీర్లు ప్రశ్నిస్తున్నారు. సీనియారిటీ అంటే కేవలం ఒక ఫైల్‌ కాదని, 14 ఏండ్ల సేవ, రాత్రింబవళ్లు ఫీల్డ్‌లో తిరిగిన కష్టమని గోడు వెళ్లబోసుకుంటున్నారు.

సీనియారిటీని ఒక్క జీవో పేరుతో తుడిచేస్తే.. రేపు ఏ ఇంజినీర్‌ అయినా పని ఎలా చేస్తాడని వాపోతున్నారు. మిషన్‌ భగీరథలో పనిచేస్తున్న సీనియర్‌ ఏఈలు తమ ప్రమోషన్‌ విషయం ఈ నెల 15వ తేదీ వరకు తేల్చాలని ప్రభుత్వానికి డెడ్‌లైన్‌ విధించారు. అప్పటికి తమ సమస్యను తీర్చకపోతే, ఉద్యమానికే సిద్ధమవుతున్నట్టు సమాచారం. వారు సమ్మెకు దిగితే తాగునీటి సరఫరాపై తీవ్ర ప్రభావం పడుతుందనే ఆందోళన వ్యక్తమవుతున్నది.