ఒలెక్ట్రా లాభాల్లో వృద్ధి

హైదరాబాద్‌, నవంబర్‌ 9: ఎలక్ట్రిక్‌ వాహన తయారీ సంస్థ ఒలెక్ట్రా గ్రీన్‌టెక్‌ ప్రోత్సాహకర ఆర్థిక ఫలితాలు ప్రకటించింది. సెప్టెంబర్‌తో ముగిసిన మూడు నెలల కాలానికిగాను సంస్థ నిర్వహణ లాభం ఏడాది ప్రాతిపదికన 18 శాతం ఎగబాకి రూ.109.89 కోట్లకు చేరుకున్నట్టు ప్రకటించింది. ఆదాయం 5 శాతం వృద్ధితో రూ.687.01 కోట్లకు చేరుకున్నది. గత త్రైమాసికంలో సంస్థ 401 ఎలక్ట్రిక్‌ వాహనాలను విక్రయించింది. దీంతో దేశవ్యాప్తంగా 4,750 ఈవీలను డెలివరీ చేసినట్టు అయింది. ఈ సందర్భంగా కంపెనీ ఎండీ మహేశ్‌ బాబు మాట్లాడుతూ..ప్రస్తుత ఆర్థిక సంవత్సరం చివరి త్రైమాసికంలో కొత్త తరం ఎలక్ట్రిక్‌ బస్సులను మార్కెట్లోకి తీసుకురానున్నట్టు, స్థానికంగా తయారీకి అధిక ప్రాధాన్యమిస్తూ, దేశీయ-అంతర్జాతీయ మార్కెట్లకు అనుగుణంగా వీటిని తీర్చిదిద్దుతున్నట్టు చెప్పారు.