ఎమ్మెల్యే మురళికి నిరసన సెగ

• ఇందిరమ్మ ఇల్లు ఎందుకియ్యరని మహిళ నిలదీత
• మహబూబాబాద్‌ మండలం వేంనూరులో ఘటన

మహబూబాబాద్‌ రూరల్‌, నవంబర్‌ 9 : పండుగ పూట మహబూబాబాద్‌ ఎమ్మెల్యే మురళీ నాయక్‌కు నిరసన సెగ తగిలింది. మొదటి విడత ఇందిరమ్మ ఇండ్ల నిర్మాణాలు పూర్తయిన క్రమంలో ప్రభుత్వం దీపావళి పండుగకు గృహ ప్రవేశాలు నిర్వహించి సంబురాలు జరిపే కార్యక్రమాన్ని ప్రారంభించింది. ఈ క్రమంలో ఆదివారం దీపావళి పండుగ రోజున మహబూబాబాద్‌ మండలం వేం నూరులో పది ఇందిరమ్మ ఇండ్ల గృహ ప్రవేశాలకు ఎమ్మెల్యే మురళీనాయక్‌ హాజరయ్యారు. గృహ ప్రవేశాల అనంత రం గ్రామ పంచాయతీ వద్ద రెండో విడత ఇందిరమ్మ ఇండ్ల లబ్ధిదారులకు ప్రొసీడింగ్స్‌ పంపిణీ చేసే కార్యక్రమాన్ని నిర్వహించారు.

అధికారులతో కలిసి ప్రొసీ డింగ్స్‌ అందజేస్తున్న క్రమంలో అక్కడే ఉన్న ఓ మహిళ వేదిక వద్దకు వచ్చి తమకు అర్హత ఉన్నా ఎందుకు ఇందిరమ్మ ఇల్లు మంజూరు చేయలేదని ఎమ్మెల్యేను నిలదీశారు. మొదటి విడతలో చేయలేదని, ఇప్పుడు కూడా ఎందుకు ఇవ్వడం లేదని ప్రశ్నించారు. గ్రామంలోని కాం గ్రెస్‌ నాయకులు తమకు ఇష్టం ఉన్న వారికి ఇండ్లు మంజూరు చేశారని, నిరుపేదలకు ఇవ్వడం లేదని ఆగ్రహం వ్యక్తం చేశారు. తాము కూడా కాంగ్రెస్‌ నాయకులమే అని, అసెంబ్లీ ఎన్నికల్లో ఎమ్మెల్యే గెలుపు కోసం ప్రచారం కూడా నిర్వహించినట్టు చెప్పారు. అక్కడే ఉన్న నాయకులు, అధికారులు మళ్లీ పరిశీలన చేసి ఇల్లు మంజూరయ్యేలా చూస్తామని మహిళకు సర్దిచెప్పారు.