ఉత్తమ్‌, కోమటి తత్తర బిత్తర.. నల్లగొండ మంత్రుల చెరోమాట

19 November 2026 - 01:30
0 0
ఉత్తమ్‌, కోమటి తత్తర బిత్తర.. నల్లగొండ మంత్రుల చెరోమాట
01
  • ఏపీ సాగర్‌ నీటి దోపిడీపై పరస్పర విరుద్ధ వ్యాఖ్యలు
  • ఎప్పుడో తెలిసింది.. అభ్యంతరాలు తెలిపాం : ఉత్తమ్‌
  • ఇప్పటివరకు తెలియదు.. ఈఈని తిట్టా : కోమటిరెడ్డి

హైదరాబాద్‌, నవంబర్‌ 18 (నమస్తే తెలంగాణ) : నాగార్జునసాగర్‌ ప్రాజెక్టుకు ఏపీ గండి కొడుతున్న అంశంలో ప్రభుత్వానికి స్పష్టత కరువైంది. దీనిపై మంత్రులే పరస్పర విరుద్ధమైన వ్యాఖ్యలు చేస్తున్నారు. ఏపీ ప్రభుత్వం వాటర్‌గ్రిడ్‌ పథకం పేరిట నాగార్జునసాగర్‌ డెడ్‌స్టోరేజీ నుంచి దాదాపు 7.8 టీఎంసీలను తరలించేందుకు సిద్ధమైంది. అందుకు సంబంధించిన పనులను ఏడాది కాలంగా గుట్టుచప్పుడు కాకుండా కొనసాగిస్తున్నది. ఈ విషయం ఇటీవల పత్రికల్లో వచ్చేవరకూ ప్రభుత్వానికి సోయిలేకుండా పోయింది. దీనిపై ప్రతిపక్ష బీఆర్‌ఎస్‌ నిలదీయడంతో ఉక్కిరిబిక్కిరి అవుతున్నది. తమ నిర్లిప్తతను కప్పిపెట్టడానికి ఓ మంత్రి ప్రయత్నించగా, మరో మంత్రి అసలు నిజాన్ని బయటపెట్టారు. ఏపీ చేపట్టిన ప్రాజెక్టు గురించి తమకు ఎప్పుడో తెలుసని, అభ్యంతరాలు తెలిపామని మంత్రి ఉత్తమ్‌ ప్రకటించగా.. ఇప్పటివరకు తమకేమీ తెలియదని మంత్రి కోమటిరెడ్డి పేర్కొన్నారు.

ఈఈపై సీరియస్‌ అయ్యా..: కోమటిరెడ్డి

హైటెక్స్‌లో నిర్వహించిన ఓ కార్యక్రమంలో పాల్గొన్న అనంతరం స్థానిక మీడియా ప్రతినిధులతో మంత్రి కోమటిరెడ్డి వెంకటరెడ్డి మాట్లాడారు. ఏపీ చేపట్టిన వాటర్‌గ్రిడ్‌ పథకంపై స్పందిస్తూ.. పనుల విషయం ఇప్పటివరకు తమకు తెలియదని అన్నారు. ఇదేవిషయమై ‘నాగార్జునసాగర్‌ ఈఈ మల్లికార్జున్‌ మీద సీరియస్‌ అయ్యాను. నువ్వు ఆంధ్రా వాడివని సైలెంట్‌గా ఉన్నవా? అని ఆగ్రహం వ్యక్తం చేశాను. సంవత్సరం నుంచి పనులు జరుగుతుంటే ఏమి చేస్తున్నావని ఈఈని నిలదీశాను. గట్టిగా అడిగే సరికి క్షమించమని రిక్వెస్ట్‌ చేశాడు’ అని వివరించారు. ఏపీకి చుక నీళ్లు పోనిచ్చేది లేదని ఆయన స్పష్టంచేశారు. అదేవిధంగా ఈఈని సస్పెండ్‌ చేయాలని సంబంధిత అధికారులను ఆదేశించినట్టు తెలిపారు.

ఎప్పుడో తెలిసింది: మంత్రి ఉత్తమ్‌

ఇక సాగునీటిపారుదలశాఖ మంత్రి ఉత్తమ్‌కుమార్‌రెడ్డి మాత్రం.. ఏపీ చేపట్టిన వాటర్‌గ్రిడ్‌ పథకం గురించి తమకు ఎప్పుడు తెలుసని పేర్కొన్నారు. సచివాలయంలో విలేకరులతో మాట్లాడుతూ ఏపీ వాటర్‌గ్రిడ్‌ పనుల గురించి తమకు ఎప్పుడో తెలిసిందని తెలిపారు. దానిపై ఇప్పటికే కేంద్ర జల్‌శక్తిశాఖకు, కేఆర్‌ఎంబీకి ఫిర్యాదు చేశామని సమర్థించుకున్నారు. ఏపీని అడ్డుకుని తీరుతామని ప్రకటించారు.

జర్నలిస్టుపై మంత్రి చిందులు

హైదరాబాద్‌, నవంబర్‌18 (నమస్తే తెలంగాణ) : అడిగిన ప్రశ్నలకు సమాధానా లు చెప్పలేక జర్నలిస్టుపై మంత్రి ఉత్తమ్‌ చిందు లు తొక్కారు.. కస్సుబుస్సుమన్నారు. సచివాలయంలో మీడియా సమావేశంలో మం త్రి.. ఏపీ చేపట్టిన వాటర్‌గ్రిడ్‌ పథకం పనులపై ఓ మీడియా ప్రతినిధి ప్రశ్నలు కురిపించారు. ఏపీ ప్రభుత్వం గత రెండేండ్లుగా సాగర వద్ద పనులు చేస్తుంటే ప్రభుత్వం ఏం చేస్తున్నదని ప్రశ్నించగానే మంత్రి ఒక్కసారిగా చిందులు తొక్కారు. పనులపై సమాచారముందని, కేంద్రానికి ఇప్పటికే ఫిర్యాదులు చేశామని సర్దిచెప్పుకొనే ప్రయత్నం చేశారు. ఏపీ చేపట్టిన పనులపై ప్రభుత్వానికి ఎప్పు డు సమాచారం వచ్చింది? ఎప్పుడు ఫిర్యా దు చేసిందో చెప్పాలని సదరు మీడియా ప్రతినిధి మరోసారి ప్రశ్నించగానే మంత్రి తీవ్ర ఆగ్రహం వ్యక్తంచేశారు. ఆ విషయాలేవీ చెప్పాల్సిన అవసరం తమకు లేదంటూ నిప్పులు చెరిగారు. ఏం మాట్లాడాలనేది మీరే చెప్తారా? అంటూ కస్సుమన్నారు. సమాధానమివ్వకుండానే లేచిపోయారు.

Comments (0)

User