పీఏసీఎస్‌ ఎన్నికలపై ఎందుకింత జాప్యం?

19 November 2026 - 01:30
0 0
పీఏసీఎస్‌ ఎన్నికలపై ఎందుకింత జాప్యం?
Hc

హైదరాబాద్‌, నవంబర్‌ 18 (నమస్తే తెలంగాణ): పీఏసీఎస్‌ ఎన్నికలపై రాష్ట్ర ప్రభుత్వం నాలుగు నెలలుగా ఒకే సమాధానం చెబుతుండటంపై హైకోర్టు అసంతృప్తి వ్యక్తంచేసింది. ఎప్పటిలోగా నిర్వహిస్తారో స్పష్టమైన కాలపరిమితితో అఫిడవిట్లు దాఖలు చేయాలని ప్రభుత్వ ప్రధానకార్యదర్శి, సహకారశాఖ ముఖ్యకార్యదర్శిని ఆదేశించింది. కొత్త జిల్లాలు, మండలాలు ఏర్పడి చాలా కాలమైనా ఎందుకు పూర్తి చేయలేకపోయారని ప్రశ్నించింది. పీఏసీఎస్‌ పాలకవర్గాలకు ఎన్నికలు నిర్వహించకుండా నామినేటెడ్‌ పద్ధతిలో సభ్యులను నియమించడాన్ని సవాలు చేస్తూ దాఖలైన రెండు పిటిషన్లపై బుధవారం జస్టిస్‌ శ్రవణ్‌కుమార్‌ విచారణ జరిపారు.

సంఘాల చట్ట నిబంధనలకు విరుద్ధంగా నామినేటెడ్‌ విధానంలో పాలకవర్గాలను ఏర్పాటు చేసేందుకు ప్రభుత్వం ఉత్తర్వులు జారీ చేసిందని పిటిషనర్ల న్యాయవాది చెప్పారు. వాటిని రద్దు చేసి, ఎన్నికల ద్వారా పాలకవర్గాలను ఏర్పాటుకు ఆదేశించాలని కోరారు. కొత్త సంఘాల ప్రక్రియ పూర్తయ్యాక ఎన్నికలు నిర్వహిస్తామని ప్రభుత్వ న్యాయవాది తెలిపారు. విచారణ రెండు వారాలకు వాయిదా పడింది.

Comments (0)

User