ఆర్టీసీ ఎండీకి సమస్యల సవాల్‌!

21 November 2026 - 07:30
0 0
ఆర్టీసీ ఎండీకి సమస్యల సవాల్‌!
Md
  • నూతన ఎండీ తనదైన మార్క్‌ చూపిస్తారా?

హైదరాబాద్‌, నవంబర్‌ 20 (నమస్తే తెలంగాణ): తెలంగాణ ఆర్టీసీకి కొత్త మేనేజింగ్‌ డైరెక్టర్‌ (ఎండీ)గా బాధ్యతలు చేపట్టిన సీనియర్‌ ఐపీఎస్‌ అధికారి డాక్టర్‌ అనిల్‌కుమార్‌కు కొన్నేండ్లుగా పరిష్కారానికి నోచుకోని ఎన్నో సమస్యలు స్వాగతం పలికాయి. ఇటీవల ఐపీఎస్‌ల బదిలీల్లో ఆర్టీసీ ఎండీగా సేవలందించిన వై నాగిరెడ్డి.. సివిల్‌ సప్లయ్స్‌ కమిషనర్‌గా బాధ్యతలు చేపట్టగా.. ఆయన స్థానంలో డాక్టర్‌ అనిల్‌కుమార్‌ ఆర్టీసీ ఎండీగా నియమితులయ్యారు. కాంగ్రెస్‌ పాలనలో ఛిన్నాభిన్నమైందని చెప్పే రంగాల్లో ఆర్టీసీ ఒకటి.

‘ఈ నెల జీతం ఇవ్వండి మహాప్రభో’ అంటూ ప్రతినెలా ఆర్టీసీ ఉన్నతాధికారులు ప్రభుత్వాన్ని వేడుకొనే దీనస్థితికి వెళ్లింది. ఆర్టీసీకి సంబంధించిన ఈడీ స్థాయి అధికారులెవరో ఒకరు.. ప్రతినెలా సెక్రటేరియట్‌ చుట్టూ తిరిగితే గాని.. ప్రతినెలా కార్మికుల వేతనాలకు నిధులు విడుదలయ్యే పరిస్థితి లేదు. ఒకవైపు మహాలక్ష్మి పథకం ద్వారా ఆర్టీసీకి బాగా లాభాలు వచ్చాయని చెప్తు న్నా.. ఆ లెక్కల్లో లాభాలెన్ని? నష్టాలెన్ని? అనేది ఎవ్వరికీ తెలియవు. ఆర్టీసీ లాభాల్లో ఉంటే.. ఈడీ స్థాయి అధికారులు ప్రతినెలా సెక్రటేరియట్‌ వైపు తిరగాల్సిన అవసరం ఏమొచ్చిందని కార్మిక సంఘాల నేతలు ప్రశ్నిస్తున్నారు. ప్రతినెలా రుణాల వడ్డీలు, పీఎఫ్‌లు జమ చేసేందుకు నానా తంటాలు పడుతున్నారు. అప్పులపై వడ్డీలు, ఇతర బకాయిలకు వందల కోట్లు ఆర్టీసీ చెల్లిస్తున్నది. ఇక ఆర్టీసీకి ప్రతినెలా ఇవ్వాల్సిన మహాలక్ష్మి బాకీ సైతం వందల కోట్లలోనే ఉంటుందని కార్మికులు చెప్తున్నారు.

Comments (0)

User