అథ్లెటిక్స్‌లో స‌త్తా చాటిన‌ రామవరం ప్రభుత్వ పాఠశాల విద్యార్థిని

– రాష్ట్రస్థాయి షాట్‌పుట్‌లో ద్వితీయ స్థానం
– జాతీయస్థాయి పోటీలకు హర్షిక ఎంపిక

రుద్రంపూర్, నవంబర్ 12 : ప్రభుత్వ పాఠశాలల్లోనూ ప్రతిభకు కొదవలేదని నిరూపిస్తూ రామవరం ప్రభుత్వ ఉన్నత పాఠశాలకు చెందిన 8వ తరగతి విద్యార్థిని జె.హర్షిక అథ్లెటిక్స్‌లో సత్తా చాటింది. గురువారం హనుమకొండలో నిర్వహించిన రాష్ట్రస్థాయి అథ్లెటిక్స్ పోటీల్లో షాట్‌పుట్ విభాగంలో ద్వితీయ స్థానం సాధించి జాతీయస్థాయి పోటీలకు ఎంపికైంది. విద్యార్థిని విజయంపై ఉపాధ్యాయులు, గ్రామస్థులు హర్షం వ్యక్తం చేశారు. ఈ సందర్భంగా విద్యార్థినిని, పీఈటీ ధ‌ర్మ‌మ్మ‌ను పాఠశాలలో ప్రత్యేక అభినందన కార్యక్రమం నిర్వహించి ఉపాధ్యాయులు, సిబ్బంది ఘనంగా సత్కరించారు. పాఠశాల హెచ్ఎం భరత్ మాట్లాడుతూ.. విద్యార్థులు చదువుతోపాటు క్రీడల్లోనూ ఆసక్తి పెంచుకుని అన్ని రంగాల్లో రాణించాలని సూచించారు. రాష్ట్ర స్థాయిలో ప్రతిభ చాటిన హర్షిక జాతీయ స్థాయిలోనూ పతకం సాధించి మరిన్ని విజయాలు అందుకోవాలని రామవరం గ్రామస్థులు, విద్యాభిమానులు ఆకాంక్షించారు.