హామీలు కాదు.. కార్యాచరణ ముఖ్యం

21 November 2026 - 03:00
0 0
హామీలు కాదు.. కార్యాచరణ ముఖ్యం
Ntlogo 1 300x169

(నేడు ప్రపంచ మత్స్య దినోత్సవం సందర్భంగా..)

తెలంగాణ మత్స్యకారుల జీవితాల్లో వెలుగులు నింపాలంటే హామీలు కాదు.. సమగ్ర కార్యాచరణ కావాలి! మత్స్యకార కుటుంబాల ఆర్థిక భద్రతకు రూ.3,000 కోట్ల ప్రత్యేక బడ్జెట్‌, ఏడాది పొడవునా జీవనభృతి, 50 ఏండ్లు నిండిన వారికి పింఛన్లు కల్పించాలి. మత్స్యకారుల హక్కుల పరిరక్షణకు మత్స్య అభివృద్ధి బోర్డు ఏర్పాటు చేసి, చెరువుల లీజు విధానాన్ని రద్దు చేయడంతో పాటు సహకార సంఘాలకు ఎన్నికలు నిర్వహించాలి. మత్స్యకారుల పిల్లలకు ప్రత్యేక గురుకులాలు, ముదిరాజ్‌ల సామాజిక, విద్య, ఆర్థిక అభ్యున్నతికి తగిన నిధులు, డీ-నోటిఫైడ్‌ తెగ గుర్తింపు, బీసీ రిజర్వేషన్లపై న్యాయబద్ధమైన నిర్ణయాలు తీసుకోవాలి. ప్రభుత్వాలు ఇచ్చిన హామీలను ఆచరణలో పెట్టి, మత్స్యకారుల హక్కులు, ఆత్మగౌరవం, ఉపాధి, భవిష్యత్తుకు భరోసా కల్పించినప్పుడే వారి జీవితాల్లో నిజమైన అభివృద్ధి వెలుగులు నిండుతాయి.

ప్రతి సంవత్సరం నవంబర్‌ 21న ప్రపంచ మత్స్య దినోత్సవం జరుపుకుంటారు. ప్రపంచవ్యాప్తంగా ఆహార, పోషకాహార భద్రతను నిర్ధారించడంలో, ఉపాధి అవకాశాలను కల్పించడంలో, లక్షలాది మంది ప్రజల జీవనోపాధికి మత్స్య, ఆక్వాకల్చర్‌ రంగాలు అందిస్తున్న కీలకమైన సేవలను గుర్తుచేసుకోవడం ఈ దినోత్సవ ప్రధాన ఉద్దేశం. గ్రామీణ ఆర్థిక వ్యవస్థలో మత్స్యరంగం కీలక పాత్ర పోషిస్తూ, మత్స్యకార కుటుంబాలకు ఆదాయ మార్గాలను కల్పించడంతో పాటు దేశ ఆర్థికాభివృద్ధికి, అంతర్జాతీయ వాణిజ్యానికి, ప్రజలకు సరసమైన ధరల్లో ప్రొటీన్‌ సమృద్ధిగా లభించే ఆహారాన్ని అందించడంలో విశేషంగా దోహదపడుతున్నది.

రాష్ట్రంలో మత్స్యకార సమాజం, ముఖ్యంగా ముదిరాజ్‌ సామాజిక వర్గం చాలాకాలంగా అనేక సమస్యలతో కొట్టుమిట్టాడుతున్నది. 2024-25 కులగణన ప్రకారం ముదిరాజ్‌, ముత్రాశి, తెనుగోళ్ల సంయుక్త జనాభా సుమారు 26.39 లక్షలు. ఇది రాష్ట్ర మొత్తం జనాభాలో 7.4 శాతం. బీసీ కులాల్లో ఇది అత్యధికం. సుమారు 8.17 లక్షల కుటుంబాలు ఉన్న ఈ సమాజం నీటి వనరులు, మత్స్య వృత్తి, పండ్లు-ఫలాల సేకరణపై ఎక్కువగా ఆధారపడి జీవిస్తున్నది. రాష్ట్రంలో మత్స్య వృత్తిపై ఆధారపడిన కుటుంబాలు సుమారు ఐదు లక్షలకు పైగా ఉన్నాయని అధికారిక అంచనాలు చెప్తున్నాయి. ఇటీవలి కాలంలో చేపపిల్లల పంపిణీకి రూ.123 కోట్లు నుంచి రూ.133 కోట్ల వరకు కేటాయింపులు జరిగినా, డిమాండ్‌ స్థాయికి ఇవి ఏమాత్రం చాలవు. కాంగ్రెస్‌ మ్యానిఫెస్టోలో, కామారెడ్డి బీసీ డిక్లరేషన్‌లో ఇచ్చిన హామీలు, సుప్రీంకోర్టు ఆదేశాలు అమలు కాకపోతే, ఈ సమాజం జీవితాల్లో వెలుగు నిండదు. కంటితుడుపు చర్యలు మాత్రమే కొనసాగితే చీకటే మిగులుతుంది. ఈ నేపథ్యంలో మొట్టమొదట మత్స్య శాఖకు కనీసం రూ.3,000 కోట్లు కేటాయించాలి.

వివిధ సామాజిక వర్గాల మధ్య ఉన్న సమస్యలు పరిష్కరించేందుకు మత్స్య అభివృద్ధి, మత్స్య కోఆపరేటివ్‌ ఫెడరేషన్‌కు ఎన్నికలు జరిపి చైర్మన్‌, పాలకమండలిని నియమించాలి. మత్స్యశాఖ పరిధిలోని చెరువులన్నింటికీ లీజులు రద్దు చేయాలి. 1964 జనవరి 22 నాటి ఉత్తర్వులు, సంబంధిత ఉత్తర్వుల ప్రకారం..ముత్తరాశి/ముదిరాజ్‌, బెస్త, గంగపుత్ర, గుండ్ల కులాలకు మాత్రమే హక్కులు ఉండేలా చట్టపరమైన ఆదేశాలు జారీ కావాలి. మత్స్య కార్మికుల పిల్లలు విద్యారంగంలో చాలా వెనుకబడి ఉన్నారు. కనుక వారికి ప్రత్యేక గురుకుల పాఠశాలలు ఏర్పాటు చేయాలి.

చేనేత, గౌడ కులస్థుల్లో 50 ఏండ్లు నిండిన వారికి పింఛన్‌ ఇస్తున్నట్లే, నీటి వనరుల్లో అధిక కష్టాలు పడే మత్స్యకారులకు కూడా 50 ఏండ్లు నిండిన ప్రతి ఒక్కరికీ పింఛన్‌ మంజూరు చేయాలి. బీసీల్లో అగ్రస్థానంలో ఉన్నా, ఇప్పటికీ బీసీ-డీ వర్గంలోనే ఉన్నది. వెనుకబడిన తరగతుల సంక్షేమం (బీ) శాఖ జారీ చేసిన జీవో 10ని సవరించి ముదిరాజ్‌లను వెంటనే (డీ-నోటిఫైడ్‌ తెగ)గా మార్చాలి. ముదిరాజ్‌ల అభివృద్ధికి రాష్ట్ర ముదిరాజ్‌ కో-ఆపరేటివ్‌ సొసైటీస్‌ కార్పొరేషన్‌కు రూ.1,000 కోట్లు కేటాయించాలి.

సుప్రీంకోర్టు ఆదేశాలు (ఎస్‌ఎల్‌సీ 11/10/2022) ప్రకారం తెలంగాణ బీసీ కమిషన్‌ తగిన ఆదేశాలు జారీ చేసి అమలు చేయాలి. కాంగ్రెస్‌ మ్యానిఫెస్టో, కామారెడ్డి బీసీ డిక్లరేషన్‌, అభయహస్తం హామీల ప్రకారం జీవో 15 (19-2009)ను అమలు చేస్తూ ముదిరాజ్‌/ముత్రాశి/తెనుగోళ్లను బీసీ-డీ నుంచి బీసీ-ఏలోకి వెంటనే పునరుద్ధరించాలి. ఈ డిమాండ్లన్నీ నిజాయితీగా అమలైనప్పుడే 26 లక్షల మంది ముదిరాజ్‌లు, నాలుగు లక్షలకు పైగా నమోదిత మత్స్యకారులు, ఐదు లక్షల మత్స్య కుటుంబాల జీవితాల్లో నిజమైన వెలుగులు నిండుతాయి. లేకపోతే కంటి తుడుపు వ్యవహారాలు మాత్రమే కొనసాగుతాయి. ప్రభుత్వం ఈ సమస్యలపై తక్షణం దృష్టి సారించి, హామీలను నెరవేర్చాలని మత్స్యకార, ముదిరాజ్‌ సమాజం ఆశిస్తున్నది.
(వ్యాసకర్త: తెలంగాణ ముదిరాజ్‌ మహాసభ రాష్ట్ర ఉపాధ్యక్షుడు)

పిడిగం నాగయ్య ముదిరాజ్‌

Comments (0)

User