సీఎం సభకు వెళ్లొస్తుండగా రెండు బస్సుల మధ్య నలిగి మహిళ మృతి.. 5లక్షల ఎక్స్‌గ్రేషియా అందజేసిన పొన్నం

20 November 2026 - 14:00
0 0
సీఎం సభకు వెళ్లొస్తుండగా రెండు బస్సుల మధ్య నలిగి మహిళ మృతి.. 5లక్షల ఎక్స్‌గ్రేషియా అందజేసిన పొన్నం
Ponnam Prabhakar

ముఖ్యమంత్రి రేవంత్‌రెడ్డి సభకు హాజరై తిరిగి ఇంటికి వెళ్లేందుకు బస్సు ఎక్కుతున్న ఓ మహిళను మృత్యువు కబళించింది. బస్సు ఎక్కే క్రమంలో పక్క నుంచి మరో బస్సు రావడంతో రెండింటి మధ్య చిక్కుకుని ఆమె ప్రాణాలు కోల్పోయింది. రెక్కాడితే గానీ డొక్కాడని ఆ కుటుంబంలో ఈ ఘటన తీరని విషాదాన్ని నింపింది.

గురువారం సిద్దిపేటలో నిర్వహించిన ముఖ్యమంత్రి సభకు హుస్నాబాద్‌ మండలం నాగారం గ్రామానికి చెందిన కొమ్ము సారవ్వ (55) హాజరైంది. సభ ముగిసిన తర్వాత స్వగ్రామానికి వెళ్లేందుకు బస్సు ఎక్కుతుండగా ప్రమాదం జరిగింది. ఆమె ఎక్కుతున్న బస్సు పక్క నుంచి మరో బస్సు రావడంతో రెండు వాహనాల మధ్య ఇరుక్కుపోయింది. తీవ్ర గాయాలైన సారవ్వ అక్కడికక్కడే మృతిచెందినట్లు స్థానికులు తెలిపారు.

సారవ్వ కూలి పనులు చేసుకుంటూ కుటుంబాన్ని పోషించేది. ఆమెకు ఒక కుమారుడు, ఒక కుమార్తె ఉన్నారు. ఇప్పటికే పేదరికంలో ఉన్న కుటుంబానికి ఆమె మరణం తీరని లోటుగా మారింది. సభకు వెళ్లిన తల్లి తిరిగి వస్తుందని ఎదురుచూస్తున్న కుటుంబ సభ్యులకు ఆమె మరణవార్త పిడుగులా మారింది. తల్లిని కోల్పోయిన పిల్లలు, కుటుంబ సభ్యులు కన్నీరుమున్నీరవుతున్నారు. నాగారం గ్రామంలో విషాదఛాయలు అలుముకున్నాయి.

కుటుంబానికి మంత్రి పొన్నం భరోసా.. రూ.5 లక్షల ఎక్స్‌గ్రేషియా

సారవ్వ మృతి విషయం తెలుసుకున్న రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ తీవ్ర దిగ్భ్రాంతి వ్యక్తం చేశారు. సిద్దిపేట ప్రభుత్వ ఆసుపత్రి మార్చురీలో ఆమె పార్థివదేహానికి మంత్రి పొన్నం ప్రభాకర్, జిల్లా కలెక్టర్ హైమావతి నివాళులర్పించారు. అనంతరం కుటుంబ సభ్యులను పరామర్శించి ప్రగాఢ సానుభూతి తెలిపారు. బాధిత కుటుంబానికి ప్రభుత్వం అండగా ఉంటుందని మంత్రి భరోసా ఇచ్చారు. తక్షణ సహాయంగా ప్రభుత్వం తరఫున రూ.5 లక్షల ఎక్స్‌గ్రేషియా చెక్కును కుటుంబ సభ్యులకు అందజేశారు. సారవ్వ మహిళా సంఘం సభ్యురాలు కావడంతో ఆ సంఘం సభ్యులకు వర్తించే రూ.10 లక్షల ప్రమాద బీమా కూడా అందేలా చర్యలు తీసుకుంటామని వెల్లడించారు.

Comments (0)

User