HCU | హెచ్‌సీయూలో ఫుడ్ పాయిజన్.. 30 మందికిపైగా విద్యార్థులకు అస్వస్థత

20 November 2026 - 14:00
0 0
HCU |  హెచ్‌సీయూలో ఫుడ్ పాయిజన్.. 30 మందికిపైగా విద్యార్థులకు అస్వస్థత
Hcu Food Poison

HCU | కొండాపూర్, నవంబర్ 20 : గచ్చిబౌలిలోని హైదరాబాద్ సెంట్రల్ యూనివర్సిటీ (హెచ్‌సీయూ)లో ఫుడ్ పాయిజన్ కలకలం రేపింది. గురువారం రాత్రి భోజనం చేసిన అనంతరం 30 మందికిపైగా విద్యార్థులు అస్వస్థతకు గురయ్యారు. మెన్స్ హాస్టల్ ఎం, అనెక్స్, ఎన్‌ఆర్‌ఎస్ హాస్టళ్లకు చెందిన విద్యార్థులు కడుపునొప్పి, ఇతర అనారోగ్య సమస్యలతో ఇబ్బందిపడ్డారు. దీంతో బాధితులను యూనివర్సిటీ హెల్త్ సెంటర్‌కు తరలించి చికిత్స అందిస్తున్నారు.

విద్యార్థుల ఆరోగ్య పరిస్థితిని దృష్టిలో ఉంచుకుని మెన్స్ హాస్టల్ ఎం వద్ద అత్యవసర వైద్య శిబిరాన్ని ఏర్పాటు చేసినట్లు విద్యార్థి సంఘాలు వెల్లడించాయి. మరోవైపు డీఎస్‌డబ్ల్యూ తెల్లవారుజామున 2.45 గంటలకు యూనివర్సిటీ హెల్త్ సెంటర్‌ను సందర్శించి బాధిత విద్యార్థుల పరిస్థితిని పరిశీలించారు.

ఈ ఘటనపై స్పందించిన విద్యార్థి సంఘాలు పలు డిమాండ్లను యూనివర్సిటీ యాజమాన్యం ముందుంచాయి. బాధితులకు మెరుగైన వైద్యం అందించాలని, పరీక్షల్లో వెసులుబాటు కల్పించాలని కోరాయి. శాశ్వత న్యూట్రిషన్ అధికారిని నియమించడంతో పాటు అన్ని మెస్‌లలో ఆహార నాణ్యత, పరిశుభ్రతపై క్రమం తప్పకుండా తనిఖీలు నిర్వహించాలని డిమాండ్ చేశాయి.

హెల్త్ సెంటర్‌లో వైద్య సదుపాయాలను మెరుగుపరచాలని, మెస్‌లలో సిబ్బంది సంఖ్యను పెంచాలని విద్యార్థులు కోరారు. భవిష్యత్తులో ఇలాంటి ఘటనలు పునరావృతం కాకుండా నాణ్యమైన, పరిశుభ్రమైన ఆహారం అందించేందుకు యాజమాన్యం తక్షణ చర్యలు తీసుకోవాలని విజ్ఞప్తి చేశారు.

Comments (0)

User