‘రైతులకు కనీస మద్దతు ధరకు చట్టబద్దత కల్పించాలి’

– స్వామినాథన్ కమిషన్ సిఫార్సులు అమలు చేయాలి
– సీపీఎం భ‌ద్రాద్రి కొత్త‌గూడెం జిల్లా నాయకుడు నిమ్మల వెంకన్న డిమాండ్

కరకగూడెం, నవంబర్ 11 : రైతులు పండించిన పంటలకు గిట్టుబాటు ధర లభించేలా కనీస మద్దతు ధరకు చట్టబద్ధత కల్పిస్తూ కేంద్ర ప్రభుత్వం ప్రత్యేక చట్టాన్ని తీసురావాలని సీపీఎం పార్టీ భ‌ద్రాద్రి కొత్త‌గూడెం జిల్లా కమిటీ సభ్యుడు నిమ్మల వెంకన్న డిమాండ్ చేశారు. బుధవారం కరకగూడెం మండల కేంద్రంలో నిర్వహించిన ఆ పార్టీ మండల కమిటీ సమావేశంలో ముఖ్య అతిథిగా పాల్గొని ఆయన మాట్లాడారు. వ్యవసాయ రంగాన్ని సంక్షోభం నుండి గటేట్టెక్కించేందుకు స్వామినాథన్ కమీషన్ పిఫార్సులను తక్షణమే అమలు చేయాలన్నారు. పోడు సాగు భూములకు విద్యుత్ సౌకర్యం కల్పించాలని ప్రభుత్వాన్ని విజ్ఞప్తి చేశారు. రైతులు ఎన్నోకష్టనష్టాలను ఎదుర్కోంటూ పంటలు పండిస్తున్నప్పటికి, సరియైన గిట్టుబాటు ధర లభించక ఆర్ధిక ఇబ్బందులకు గురవుతున్నారని ఆవేదన వ్యక్తం చేశారు.

రైతుల శ్రమకు తగిన ప్రతిఫలం దక్కాలంటే కనీస మద్దతు ధర చట్టబద్ధమైన హామి కల్పించాలన్నారు. రైతుల హక్కుల సాధన కోసం దేశ వ్యాప్తంగా రైతు సంఘాలు ఐక్యంగా ఉద్యమించాలని పిలుపునిచ్చారు. రైతు సంఘం అఖిల భారత మహాసభలు రైతు సమస్యలపై విస్తృతంగా చర్చించి భవిష్యత్ ఉద్యమాలకు దిశానిర్ధేశం చేయనున్నాయని తెలిపారు. ఈ నెల 15న నల్లగొండ జిల్లాలో నిర్వహించనున్న భారీ బహిరంగ సభకు రైతులు, వ్యవసాయ కార్మికులు, ప్రజాస్వామ్యవాదులు, పార్టీ కార్యకర్తలు వేలాదిగా తరలివచ్చి విజయవంతం చేయాలని కోరారు. ఈ కార్యక్రమంలో పార్టీ మండల కార్యదర్శి కొమరం కాంతారావు, వ్యవసాయ కార్మిక సంఘ జిల్లా నాయకులు కురసం లక్ష్మయ్య, మండల కమిటీ సభ్యులు చర్చ సత్యం, కనితి రాము, బిలపాటి శంకరయ్య, పద్మ, గణేష్, లక్ష్మయ్య పాల్గొన్నారు.