మోటకొండూర్ మండల కేంద్రంలో క్షుద్ర పూజల కలకలం

మోటకొండూర్, నవంబర్ 12 : మోటకొండూర్ మండల కేంద్రంలో గురువారం ఉదయం క్షుద్ర పూజలంటూ కనిపించిన వస్తువులు కలకలం రేపాయి. హనుమాన్ దేవాలయం సమీపంలోని ఓ ఇంటి వద్ద గుర్తు తెలియని వ్యక్తులు బొమ్మతో పాటు నిమ్మకాయలు, కుంకుమ, పసుపు ఉంచడంతో స్థానికులు భయాందోళనకు గురయ్యారు. ఉదయం ఇంటి సమీపంలో ఈ వస్తువులను గమనించిన స్థానికులు ఒక్కసారిగా ఉలిక్కిపడ్డారు. దీంతో ఈ విషయం మండల కేంద్రంలో చర్చనీయాంశంగా మారింది. విషయం తెలుసుకున్న పోలీసు అధికారులు వెంటనే ఘటనా స్థలానికి చేరుకున్నారు. అక్కడ ఉన్న వస్తువులను పరిశీలించి, పంబాలవారిని పిలిపించి వారి ద్వారా వాటిని తొలగింపజేశారు. రాత్రి సమయంలో గుర్తు తెలియని వ్యక్తులు ఈ వస్తువులను అక్కడ ఉంచి వెళ్లి ఉంటారని స్థానికులు అనుమానిస్తున్నారు. జనావాసాల మధ్య, హనుమాన్ దేవాలయానికి సమీపంలో ఇలాంటి ఘటన చోటుచేసుకోవడంతో ప్రజలు ఆందోళన వ్యక్తం చేస్తున్నారు. ఈ ఘటనకు పాల్పడిన వ్యక్తులను గుర్తించి తగిన చర్యలు తీసుకోవాలని స్థానికులు గ్రామ పంచాయతీని, పోలీసులను కోరుతున్నారు.