భూముల రీ-సర్వేను పకడ్బందీగా నిర్వహించాలి : అదనపు కలెక్టర్ హరిసింగ్

అర్వపల్లి, నవంబర్ 19 : భూముల రీ-సర్వే ప్రక్రియను పకడ్బందీగా నిర్వహించి, రైతుల భూముల హద్దులను కచ్చితంగా గుర్తించాలని సూర్యాపేట అదనపు కలెక్టర్ బి.హరిసింగ్ అధికారులకు సూచించారు. జాజిరెడ్డిగూడెం మండలం కేశారం గ్రామంలో రీ-సర్వే పనులను గురువారం ఆయన క్షేత్రస్థాయిలో పరిశీలించారు. ఈ సందర్భంగా సర్వే బృందంతో పాటు రైతులతో మాట్లాడి ప్రక్రియ కొనసాగుతున్న తీరును అడిగి తెలుసుకున్నారు. రీ-సర్వేలో భాగంగా భూముల సరిహద్దులను క్షుణ్ణంగా పరిశీలించాలని, పట్టాదారులు, సరిహద్దు రైతుల సమక్షంలో కొలతలు చేపట్టాలని సూచించారు. భవిష్యత్లో భూ వివాదాలకు తావులేకుండా సర్వే వివరాలను పక్కాగా నమోదు చేయాలన్నారు. రైతులు కూడా తమ భూముల హద్దుల గుర్తింపులో సర్వే బృందాలకు సహకరించాలని కోరారు. ఈ కార్యక్రమంలో సర్వే అండ్ ల్యాండ్ రికార్డు ఏడీ శ్రీనివాసరావు, తాసీల్దార్ శ్రీకాంత్, డిప్యూటీ ఇన్స్పెక్టర్, మండల సర్వేయర్ ప్రకాష్, జీపీఓ, లైసెన్స్డ్ సర్వేయర్లు, గ్రామ రైతులు పాల్గొన్నారు.
Comments (0)