భట్టి పర్యటన వేళ బీఆర్ఎస్ నేతల నిర్బంధం.. దాస్యం వినయ్ భాస్కర్ హౌస్ అరెస్ట్‌!

డిప్యూటీ సీఎం భట్టి విక్రమార్క హన్మకొండ జిల్లా పర్యటన నేపథ్యంలో బీఆర్ఎస్ నేతల అక్రమ నిర్బంధం కొనసాగుతోంది. ప్రభుత్వ మాజీ చీఫ్ విప్, మాజీ ఎమ్మెల్యే దాస్యం వినయ్ భాస్కర్‌ను వడ్డేపల్లిలోని ఆయన నివాసంలో హౌస్ అరెస్ట్ చేశారు. వరంగల్ పశ్చిమ నియోజకవర్గ పరిధిలో పలువురు బీఆర్ఎస్ నాయకులను పోలీసులు అదుపులోకి తీసుకున్నట్లు సమాచారం.

ఇప్పటికే కుడా మాజీ చైర్మన్ మర్రి యాదవరెడ్డితో పాటు కాజీపేట డివిజన్‌కు చెందిన పలువురు బీఆర్ఎస్ నాయకులను పోలీసులు అదుపులోకి తీసుకుని హసన్‌పర్తి పోలీస్ స్టేషన్‌కు తరలించారు. వారిని పరామర్శించేందుకు వెళ్లిన మాజీ కార్పొరేటర్ దాస్యం విజయ్ భాస్కర్‌ను సైతం పోలీసులు అరెస్ట్ చేశారు.

మరోవైపు హనుమకొండ పోలీస్ స్టేషన్‌లో మాజీ కార్పొరేటర్ సోదా కిరణ్, వరంగల్ పశ్చిమ నియోజకవర్గ కోఆర్డినేటర్ పులి రజనీకాంత్, బీఆర్ఎస్వీ ప్రెసిడెంట్ బైరపాక ప్రశాంత్‌ను పోలీసులు అరెస్టు చేశారు.