ప్రమాద రహిత సింగరేణి.. నూతన కార్మిక భద్రతా నిబంధనలపై అవగాహన శిబిరం

రుద్రంపూర్, నవంబర్ 19 : సురక్షిత సింగరేణి – ప్రమాద రహిత సింగరేణి లక్ష్య సాధనలో భాగంగా కార్మికుల భద్రత, ఆరోగ్య పరిరక్షణకు అత్యంత ప్రాధాన్యతనిస్తూ కార్మిక భద్రత అలాగే పని పరిస్థితుల కోడ్ – 2020, కేంద్ర నిబంధనలు – 2026 పై అవగాహన శిబిరాన్ని సింగరేణి కాలరీస్ కంపెనీ లిమిటెడ్, కొత్తగూడెం ఏరియా ఆధ్వర్యంలో నిర్వహించారు. భారత ప్రభుత్వ కార్మిక, ఉపాధి మంత్రిత్వ శాఖకు చెందిన గనుల భద్రతా సంచాలక కార్యాలయం (డైరెక్టరేట్ జనరల్ ఆఫ్ మైన్స్ సేఫ్టీ), దక్షిణ మధ్య మండలం, హైదరాబాద్ ప్రాంతం–1 పర్యవేక్షణలో 2026 కార్యక్రమం గురువారం కొత్తగూడెం ఏరియాలోని ఆర్సీఓఏ క్లబ్లో ఈ కార్యక్రమం జరిగింది. ఈ కార్యక్రమానికి ముఖ్య అతిథిగా గనుల భద్రతా ఉప సంచాలకులు (డీఎంఎస్) ఐ. సత్యనారాయణ, గౌరవ అతిథిగా సింగరేణి డైరెక్టర్ (ఆపరేషన్స్) ఎల్.వి. సూర్యనారాయణ పాల్గొన్నారు. కార్పొరేట్ జనరల్ మేనేజర్ (సేఫ్టీ) కృష్ణ గోపాల్ తివారీ కార్యక్రమానికి అధ్యక్షత వహించారు.
ఈ సందర్భంగా ముఖ్య అతిథి ఐ. సత్యనారాయణ మాట్లాడుతూ, నూతన కార్మిక భద్రతా నిబంధనలు, వాటి అమలు విధానం, ఉద్యోగుల భద్రత, ఆరోగ్య పరిరక్షణ, వ్యక్తిగత రక్షణ పరికరాల (పీపీఈ) వినియోగం, గనుల్లో సురక్షిత పని వాతావరణం కల్పించడం వంటి కీలక అంశాలపై వివరించారు. నూతన కార్మిక చట్టాల ప్రకారం పాటించాల్సిన నిబంధనలు, డిజిటల్ విధానంలో రికార్డుల నిర్వహణ, ఉద్యోగులు, యాజమాన్యం బాధ్యతలు, భద్రతా ప్రమాణాల అమలు తదితర అంశాలపై అవగాహన కల్పించారు. గనుల్లో ప్రమాదాల నివారణకు ప్రతి ఒక్కరూ భద్రతా నిబంధనలను తప్పనిసరిగా పాటించాలని, వ్యక్తిగత రక్షణ పరికరాలను సక్రమంగా వినియోగించాలని, సురక్షిత పని విధానాలను అలవర్చుకోవాలని ఈ సందర్భంగా సూచించారు. నూతన నిబంధనలపై ఉద్యోగులకు పూర్తి అవగాహన కల్పించడం ద్వారా ప్రమాదాలను తగ్గించి, ఆరోగ్యకరమైన, సురక్షితమైన పని వాతావరణాన్ని ఏర్పాటు చేయవచ్చని పేర్కొన్నారు.
సురక్షిత సింగరేణి – ప్రమాద రహిత సింగరేణి లక్ష్యాన్ని సాధించేందుకు ప్రతి ఉద్యోగి భద్రతా నియమాలను పాటిస్తూ బాధ్యతాయుతంగా విధులు నిర్వహించాలని, ఇలాంటి అవగాహన కార్యక్రమాలు ఎంతో దోహదపడతాయని నిర్వాహకులు పేర్కొన్నారు. ఈ అవగాహన శిబిరంలో కొత్తగూడెం, సత్తుపల్లి, ఎల్లందు, మణుగూరు ఏరియాలతో పాటు కార్పొరేట్ కార్యాలయానికి చెందిన అధికారులు పాల్గొన్నారు. సత్తుపల్లి ఏరియా జనరల్ మేనేజర్ ఎస్. వెంకట చారి, కొత్తగూడెం ఏరియా జనరల్ మేనేజర్ సి.హెచ్. వెంకటరమణ, ఏసీఎంఓ ఉషా, గనులు, ఓపెన్కాస్ట్ ప్రాజెక్టుల ఏజెంట్లు, ప్రాజెక్టు అధికారులు, ఏరియా ఇంజనీర్లు, ఏరియా సేఫ్టీ అధికారులు, గనుల మేనేజర్లు, పర్సనల్, ఐఈడీ అధికారులు, వివిధ విభాగాల అధిపతులు, మైన్ ఓవర్మెన్లు, మైనింగ్ సర్దార్లు పాల్గొన్నారు.
Comments (0)