ఇంజినీరింగ్‌ విద్య పెట్టుబడి-రాబడి కావొద్దు!

20 November 2026 - 05:30
0 0
ఇంజినీరింగ్‌ విద్య పెట్టుబడి-రాబడి కావొద్దు!
01

విద్య వ్యాపారీకరణపై తల్లిదండ్రులు, ప్రభుత్వం, సమా జం ఆలోచించాల్సిన సమయం ఇది. ఇంజినీరింగ్‌ విద్య ఒకప్పుడు మధ్యతరగతి కుటుంబాల ఆశలకు ప్రతీక. తమ పిల్లలు ఇంజినీర్‌ కావాలి, మంచి ఉద్యోగం సంపాదించాలి, కుటుంబ ఆర్థిక పరిస్థితిని మెరుగుపరచాలి అనేది లక్షలాది తల్లిదండ్రుల కల. కానీ నేడు కొన్ని సందర్భాల్లో ఆ కలకు భారీ ధర ఏర్పడింది. మంచి కళాశాలలో సీటు కోసం లక్షల్లో ఖర్చు చేయాల్సిన పరిస్థితులు, నాలుగేండ్లపాటు ఫీజులు, హాస్టల్‌ ఖర్చులు, ఇతర విద్యావ్యయాలు ఇవన్నీ కలిపి ఒక సాధారణ మధ్యతరగతి కుటుంబానికి ఇంజినీరింగ్‌ విద్య ఆర్థిక సవాల్‌గా పరిణమిస్తున్నది.

తల్లిదండ్రులంతా తమ పిల్లలు మంచి స్థాయికి ఎదుగాలని కోరుకుంటారు. కానీ విద్యను పూర్తిగా ‘పెట్టుబడి-రాబడి’ కోణంలో చూడటం ప్రమాదకరం. ఒక కుటుంబం తమ పిల్లల ఇంజినీరింగ్‌ విద్య కోసం లక్షలు ఖర్చు చేస్తే, ఆ ఖర్చుకు భవిష్యత్తులో మంచి ఉద్యోగం ద్వారా రాబడి రావాలని ఆశిస్తుంది. మంచి ప్లేస్మెంట్‌ వస్తే ఊపిరి పీల్చుకుంటుంది. ఉద్యోగం రాకపోతే మాత్రం ‘పిల్లల చదువుకు పెట్టిన డబ్బంతా ఏమయ్యింది?’ అనే ఆందోళన మొదలవుతుంది. ఇలా విద్య జ్ఞానం కోసం కాకుండా, ఒక రకమైన ఆర్థిక పందెంగా మారే ప్రమాదం ఉన్నది.

‘నా చదువుకు ఇంత ఖర్చయింది; ఇప్పుడు ఏదో ఒకవిధంగా ఎక్కువ సంపాదించాలి‘ అనే ఆలోచన వృత్తి జీవితంలో నైతిక నిర్ణయాలపై ప్రభావం చూపకుండా ఉండాలంటే విద్యతో పాటు వృత్తి నైతికత, సామాజిక బాధ్యత, నిజాయితీ కూడా బోధించాలి. మధ్యతరగతి కుటుంబాలే ఎక్కువగా నష్టపోతున్నాయా? ఈ ప్రశ్నను సమాజం గంభీరంగా పరిశీలించాలి. సంపన్న కుటుంబాల వారికి విద్య కోసం భారీగా ఖర్చు భరించడం సులువు కావచ్చు. ఆర్థికంగా బలహీన కుటుంబాలకు ప్రభుత్వ పథకాలు, స్కాలర్‌షిప్‌ కొంతమేరకు సహాయపడవచ్చు. మధ్యతరగతి కుటుంబాలు మాత్రం తమ జీవితకాల పొదుపులను పిల్లల విద్య కోసం వివిధ రూపాల్లో ఖర్చు చేస్తున్నాయి. అందుకే ఇంజినీరింగ్‌ విద్య ఒక కుటుంబానికి ‘అవకాశం‘ కావాలి కానీ ‘ఆర్థిక జూదం’ కాకూడదు.

కళాశాల ఒక వేదికను ఇవ్వగలదు; కానీ సామర్థ్యాన్ని నిర్మించుకోవాల్సింది విద్యార్థే. సుందర్‌ పిచాయ్‌ వంటి భారతీయ మూలాలున్న ప్రపంచ స్థాయి టెక్‌ల విద్యా ప్రయాణాన్ని పరిశీలించినప్పుడు, కేవలం కళాశాల పేరు కాదు-వారి కృషి, జ్ఞానంపై ఆసక్తి, నిరంతర అభ్యాసం, సమస్యలను అర్థం చేసుకునే సామర్థ్యం వంటి అంశాలే వారి ఎదుగుదలకు కీలకంగా కనిపిస్తాయి. ఇప్పుడు ప్రపంచమే ఒక తరగతి గది.

ఇప్పటి విద్యార్థులకు నేర్చుకోవడానికి అపార అవకాశాలు ఉన్నాయి. ఆన్‌లైన్‌ కోర్సులు, విద్యా వీడియోలు, ఓపెన్‌ సోర్స్‌ సాఫ్ట్‌వేర్‌, టెక్నికల్‌ డాక్యుమెంటేషన్‌, ప్రాజెక్టులు, వర్చువల్‌ ల్యాబ్స్‌ వంటి ఎన్నో వనరులు అందుబాటులో ఉన్నాయి. అందువల్ల విద్యార్థి కళాశాలపై మాత్రమే ఆధారపడాల్సిన అవసరం లేదు. కళాశాల ఇచ్చే విద్యతో పాటు స్వయంగా నేర్చుకోవడం, ప్రాజెక్టులు చేయడం, పరిశ్రమలో ఉపయోగించే సాంకేతికతలను తెలుసుకోవడం, ఇంటర్న్‌షిప్‌ చేయడం ద్వారా తన సామర్థ్యాన్ని పెంచుకోవచ్చు. భవిష్యత్తులో ఉద్యోగ మార్కెట్లో నిలబడేది కేవలం డిగ్రీ కాదు, డిగ్రీతో పాటు నిరూపించగల నైపుణ్యం. ఉన్నత విద్యను పర్యవేక్షించే ప్రభుత్వ, నియంత్రణ సంస్థలు కేవలం నిబంధనలు రూపొందించడమే కాకుండా వాటి అమలును కూడా సమర్థవంతంగా పర్యవేక్షించాలి. ఫీజు నిర్మాణం, ప్రవేశ ప్రక్రియ, మౌలిక వసతులు, ఫ్యాకల్టీ, విద్యాప్రమాణాలు, ప్లేస్మెంట్‌ గణాంకాలు వంటి అంశాలపై ఆడిట్‌ అవసరం. ప్రభుత్వ సాయం విద్యార్థికి చేరడం, విద్యార్థికి నాణ్యమైన విద్య అందేలా చూడడం కీలకమైన విషయాలు. తల్లిదండ్రుల ఆలోచనలో కూడా మార్పు అవసరం. వారు తమ పిల్లల భవిష్యత్తు గురించి ఆలోచించాలి కానీ ఇతర కుటుంబాలతో పోల్చి నిర్ణయాలు తీసుకోకూడదు.

డబ్బున్నా లేకపోయినా ప్రతిభ, కృషి, నైపుణ్యానికి సమానమైన విలువ లభించే విద్యావ్యవస్థ కావాలి. విద్యాసంస్థలు పారదర్శకంగా, బాధ్యతాయుతంగా, నాణ్యమైన విద్యను అందించే వ్యవస్థలు. విద్యార్థులను ఆర్థిక ఒత్తిళ్ల మధ్య కాకుండా, నైపుణ్యాలు, విలువలతో ఎదుగనిచ్చే వాతావరణం కల్పించాలి. విద్యార్థి చదువుకు ఎంత డబ్బు ఖర్చయిందనేది అతని నిజాయితీకి కొలమానం కాదు. జ్ఞానం, నైపుణ్యం, ఆలోచనా శక్తి, నిజాయితీ, వృత్తి నైతికత, సమాజం పట్ల బాధ్యత ఉండాలి. అప్పుడే ఇంజినీరింగ్‌ విద్య ఒక ఖరీదైన డిగ్రీ కాకుండా, ఒక కుటుంబాన్ని మాత్రమే కాదు-మొత్తం సమాజాన్ని ముందుకు తీసుకెళ్లే శక్తిగా మారుతుంది.

(వ్యాసకర్త: ఓయూ జేఏసీ ప్రధాన కార్యదర్శి)
బిక్షపతి నాయక్‌

Comments (0)

User