నీరసించిన పునరుత్పాదక శక్తి

• ఆర్సీవో లక్ష్యాలకు ఆమడ దూరంలో తెలంగాణ
• ఎడాపెడా ఫైన్‌లు విధిస్తున్న కేంద్ర ప్రభుత్వం
• ఈ ఏడాది జరిమానా ఏకంగా రూ.237 కోట్లు

హైదరాబాద్‌, నవంబర్‌ 9 (నమస్తే తెలంగాణ): పునరుత్పాదక శక్తి (రెన్యువబుల్‌ పవర్‌) వినియోగంలో తెలంగాణ అత్యంత దారుణంగా వెనుకబడింది. కేంద్ర ప్రభుత్వం విధించిన రెన్యువబుల్‌ కన్జంప్షన్‌ ఆబ్లిగేషన్‌ (ఆర్సీవో) లక్ష్యాలకు ఆమడ దూరంలో నిలిచింది. ఏటా ఈ లక్ష్యం పెరుగుతుండగా.. వినియోగం మాత్రం అందుకు అనుగుణంగా పెరుగడం లేదు. కేంద్రం నిర్దేశిస్తున్న టార్గెట్‌కు, రాష్ట్రంలో వినియోగిస్తున్న పునరుత్పాదక విద్యుత్తుకు మధ్య భారీ లోటు ఉంటున్నది మరి. దీంతో ఎడాపెడా జరిమానాలు పడుతున్నాయి.

గత ఆర్థిక సంవత్సరం రాష్ట్ర డిస్కమ్‌లు రూ.69 కోట్ల జరిమానా చెల్లించాయి. ఈసారి ఈ జరిమానా రూ.237 కోట్లకు చేరడం గమనార్హం. 2025-26లో 8.5 శాతంగా ఉన్న పునరుత్పాదక శక్తి వినియోగ లోటు.. 2026-27లో 15.5 శాతానికి పెరుగుతున్నది. ఈ క్రమంలోనే 2029-30 నాటికి 24.3 శాతానికి చేరే అవకాశం ఉందంటున్నారు. ఇదే గనుక జరిగితే మన డిస్కమ్‌లు రూ.700 కోట్లకుపైగా జరిమానాలు చెల్లించాల్సి ఉంటుంది. అంతిమంగా ఈ భారం రాష్ట్రంలోని వినియోగదారులపైనే పడుతుంది.

ఉన్నది రెండే మార్గాలు
ఆర్సీవో లక్ష్యాలు చేరాలన్నా, జరిమానాల నుంచి బయటపడాలన్నా.. రాష్ట్రంలో సౌర, పవన విద్యుత్తు, బ్యాటరీ ఎనర్జీ స్టోరేజీ (బెస్‌), పంప్డ్‌ స్టోరేజీ పవర్‌ ప్లాంట్లను పెద్ద ఎత్తున ఏర్పాటు చేయాలని నిపుణులు సూచిస్తున్నారు. లేనిపక్షంలో ఇతర రాష్ర్టాల్లోని ప్లాంట్లలో ఉత్పత్తయ్యే పునరుత్పాదక విద్యుత్తు కొనుగోలుకు ఒప్పందాలనైనా కుదుర్చుకోవాలని చెప్తున్నారు. లేకుంటే ఆర్సీవో లక్ష్యాలను చేరుకోవడంలో విఫలమై భారీగా జరిమానాలు చెల్లించాల్సిందేనని హెచ్చరిస్తున్నారు.

కానీ జెన్‌కో ఆధ్వర్యంలో పునరుత్పాదక శక్త్తి ప్లాంట్లను ఏర్పాటు చేయడంలో దారుణంగా విఫలమైన రాష్ట్ర ప్రభుత్వం.. బహిరంగ మార్కెట్‌ నుంచి రెన్యువబుల్‌ పవర్‌ కొనుగోలుకు ఆసక్తి చూపుతున్నది. ఈ క్రమంలో మన డిస్కమ్‌లు దాదాపు 7 వేల మెగావాట్ల పునరుత్పాదక విద్యుత్తు కొనుగోలుకు ప్రయత్నిస్తున్నాయి. దీంతో అటు ఖజానాపై, ఇటు వినియోగదారులపై పెను భారమే పడుతుందని ఇండస్ట్రీ ఎక్స్‌పర్ట్స్‌ అంటున్నారు.

Ppp