ధాన్యం కొనుగోలు చేయ‌కుండా కాంగ్రెస్ రైతుల‌ను మోసం చేస్తున్న‌ది : పుట్ట మ‌ధుక‌ర్

మంథ‌ని : పెద్ద‌ప‌ల్లి జిల్లా మంథ‌ని ఏఎంసీలో ధాన్యం కొనుగోలు కేంద్రం ఏర్పాటు చేయకుండా రైతులను కాంగ్రెస్ ప్రభుత్వం ఆగం చేస్తున్న‌దని మాజీ ఎమ్మెల్యే పుట్ట మ‌ధుక‌ర్ అన్నారు. గురువారం మంథని ఏఎంసీ ధాన్యం కొనుగోలు కేంద్రాన్ని సందర్శించారు. ఈ సంద‌ర్భంగా ఆయ‌న మాట్లాడుతూ..ధాన్యాన్ని ప్రైవేటుగా రూ. 3000 వరకు ఇచ్చి కొనుగోలు చేస్తున్నారని సీఎం అనడం ఎంతవరకు సమంజసమ‌న్నారు. ప్రభుత్వమే దళారులను ప్రోత్సహిస్తూ రైతులను ఆగం చేయాలని చూస్తున్నది. మంథనిలో రూ. 2500లకు కూడా ధాన్యాన్ని కొనుగోలు చేయడం లేదనడానికి ఏఎంసీలో ఉన్న ధాన్యమే నిదర్శనమ‌న్నారు. ఏఎంసీలో ఉన్న ధాన్యం కుప్పలను కొంగలకు ఆహారంగా మారుతున్నాయి.

సీఎంకు భజన చేస్తున్న మంథని ఎమ్మెల్యే శ్రీధర్ బాబు కాంగ్రెస్ ప్రభుత్వం వెంటనే ప్రజలను చులకన చేయడం బంద్ చేయాల‌న్నారు. భారత రాజ్యాంగాన్ని అవమానించే పార్టీ.. ఓవైపు కోతలతో దోపిడీ చేస్తూ ఇప్పుడు దళారులను రైతుల మీదకు పంపిస్తున్నద‌ని ఆరోపించారు. కాంగ్రెస్ ప్రభుత్వం మంథనిలో అభివృద్ధిని విస్మరించి అన్ని వర్గాల ప్రజలను మోసం చేస్తున్నార‌ని మండిప‌డ్డారు. మంత్రి శ్రీధర్ బాబు అధికారం, పదవులు, డబ్బు సంపాదించిన ధ్యేయంగా పనిచేస్తున్నాడు. ఇప్పటికైనా ప్రభుత్వం కళ్లు తెరుచి వెంటనే ధాన్యం కొనుగోలు ప్రారంభించడంతోపాటు రైతులకు మద్దతు ధర కల్పించాలని డిమాండ్ చేశారు.