‘దళారులతో కుమ్మక్కై రైతులను దగా చేస్తున్న సర్వభ్రష్ట ప్రభుత్వం’

– రైతుల ఉసురు తీస్తున్న అసమర్ధ ముఖ్యమంత్రి
– రైతుల గోస పట్టని జిల్లా మంత్రి ఉత్త‌మ్ కుమార్‌రెడ్డి
– ధాన్యం కొనుగోలు కేంద్రాలు ఏర్పాటు చేసి మద్దతు ధర ఇవ్వాలి
– మొండి వైఖరి విడనాడకపోతే ప్రత్యక్ష ఆందోళన
– కోదాడలో మీడియాతో మాజీ ఎమ్మెల్యే బొల్లం మ‌ల్ల‌య్య యాద‌వ్‌

కోదాడ‌, న‌వంబ‌ర్ 12 : దళారులతో రాష్ట్ర ప్రభుత్వం కుమ్మక్కై రాత్రికి రాత్రే ధాన్యం ధర తగ్గించి రైతులను దగా చేస్తుందని కోదాడ మాజీ ఎమ్మెల్యే బొల్లం మల్లయ్య యాదవ్ తీవ్రస్థాయిలో మండిపడ్డారు. గురువారం కోదాడలోని తన నివాసంలో మీడియాతో ఆయ‌న మాట్లాడారు. అలవికాని హామీలను ఇచ్చి అధికారంలోకి వచ్చిన రేవంత్ రెడ్డి ప్రభుత్వం రైతు వ్యతిరేక విధానాలను అవలంబిస్తూ రైతుల ఉసురు తీసుకుంటుందని. అసమర్థ ముఖ్యమంత్రిగా రేవంత్ రెడ్డి చరిత్రలోకి ఎక్కుతారన్నారు. వాన‌కాలం సీజన్‌లో ఎల్ నినో ప్రభావంతో వర్షాలు లేక పంటలు నష్టపోయిన మండలాలను కరువు మండలాలుగా ప్రకటించి ప్రభుత్వం చేతులు దులుపుకుందని, ఇప్పటివరకు సదరు మండలాలలో నష్టపోయిన రైతులను గుర్తించకపోవడంతో పాటు ఒక పైసా కూడా చెల్లించలేదని, ఇది ప్రజా ప్రభుత్వం కాదని ప్రజా ప్రతీకార ప్రభుత్వమని విమర్శించారు .

ఓపక్క కరువుతో అరాకొరా పండిన ధాన్యం కళ్లాల వద్దకు వచ్చి, అమ్ముకునే సమయానికి దళారులతో కాంగ్రెస్ నాయకులు, ప్రభుత్వం కుమ్మక్కై రేట్లను అమాంతం తగ్గించడం అత్యంత దారుణమన్నారు. రైతులు ఆరుగాలం కష్టపడి పండించిన పంటకు కనీస గిట్టుబాటు ధర కూడా దక్కక తీవ్ర ఇబ్బందులు ఎదుర్కొంటున్నారని ఆవేదన వ్యక్తం చేశారు. రైతులకు గిట్టుబాటు ధర కల్పించడంతో పాటు, ప్రభుత్వం ఏర్పడటానికి ముందు తాము ఇచ్చిన ప్రధాన హామీ అయిన ‘ధాన్యానికి బోనస్’ ను తక్షణమే రైతుల ఖాతాల్లో జమ చేయాలని ఆయన డిమాండ్ చేశారు. రైతులు వరి కోతలు కోసి, రోజుల తరబడి రోడ్లమీద కుప్పలు పోసుకుని ఎదురు చూస్తున్నప్పటికీ.. ఇంతవరకు ధాన్యం కొనుగోలు కేంద్రాలను ప్రారంభించకపోవడం శోచనీయమన్నారు. ఇప్పటివరకు కొనుగోలు కేంద్రాలను ఏర్పాటు చేయలేదని ఈ వాస్తవాన్ని. పత్రికలు, సామాజిక మాధ్యమాలు ఘోషిస్తున్నప్పటికీ, ధాన్యం కొనేవారు లేక రైతులు రోడ్లపై కన్నీరు పెడుతున్నప్పటికీ కాంగ్రెస్ ప్రభుత్వానికి కనీసం చీమ కుట్టినట్లు కూడా లేకపోవడం సిగ్గుచేటన్నారు.

తక్షణమే ఐకేపీ కేంద్రాలను యుద్ధ ప్రాతిపదికన ప్రారంభించి, రైతులకు మద్దతు ధరతో పాటు బోనస్ చెల్లించాలని, అలాగే పెండింగ్ లో ఉన్న కరువు పరిహారాన్ని వెంటనే విడుదల చేయాలని బొల్లం మల్లయ్య యాదవ్ ప్రభుత్వాన్ని డిమాండ్ చేశారు. జిల్లా మంత్రి హెలికాప్టర్‌లో తిరుగుతూ జల్సా చేస్తున్నారే కానీ రైతుల గోస పట్టించుకోవడం లేదన్నారు. సమస్యల పరిష్కారంలో ప్రభుత్వం మొండి వైఖరిని విడనాడకపోతే రైతాంగంతో కలిసి ప్రభుత్వ మెడలు వంచేలా పెద్ద ఎత్తున ఆందోళన కార్యక్రమాలు చేపడతామని ఆయన హెచ్చరించారు. ఈ సమావేశంలో మండల నాయకులు నర్సిరెడ్డి సురేశ్‌, బట్టు శివాజీ, కందిబండ సత్యనారాయణ, నయీమ్, ఉపేందర్, రమేష్, కిరణ్ కుమార్, వెంకటేశ్వరరావు, ఆంజనేయులు, శ్రీనివాస్ రెడ్డి, నరసింహారావు, కరీముల్లా, బాబా, ఉపేందర్ గౌడ్ పాల్గొన్నారు.