చింతాబాబు మాదిగకు డాక్టర్ బి.ఆర్.అంబేద్కర్ నేషనల్ అవార్డు

16 November 2026 - 23:30
0 0
చింతాబాబు మాదిగకు డాక్టర్ బి.ఆర్.అంబేద్కర్ నేషనల్ అవార్డు
చింతాబాబు మాదిగకు డాక్టర్ బి.ఆర్.అంబేద్కర్ నేషనల్ అవార్డు

– ​న్యూఢిల్లీలో జాతీయ బహుజన సాహిత్య అకాడమీ ఆధ్వర్యంలో పురస్కార ప్రధానం

కోదాడ, న‌వంబ‌ర్ 16 : కోదాడ ప్రాంతానికి చెందిన దళిత ఉద్యమకారుడు చింతాబాబు మాదిగ ప్రతిష్ఠాత్మక ‘డాక్టర్ బి.ఆర్.అంబేద్కర్ నేషనల్ అవార్డు’ను అందుకున్నారు. సోమవారం న్యూఢిల్లీలోని కరోల్ బాగ్ కళామందిరంలో జాతీయ బహుజన సాహిత్య అకాడమీ ఆధ్వర్యంలో నేషనల్ అవార్డు గ్రహీతల సత్కార సభ ఘనంగా జరిగింది. ఈ కార్యక్రమానికి ముఖ్య అతిథులుగా హాజరైన కరోల్ బాగ్ ఆమ్ ఆద్మీ పార్టీ ఎమ్మెల్యే, నేషనల్ లీగల్ అడ్వైజర్ సుధారాణి, జాతీయ బహుజన సాహిత్య అకాడమీ జాతీయ అధ్యక్షుడు నల్ల రాధాకృష్ణ కలిసి చింతాబాబు మాదిగకు ఈ పురస్కారాన్ని ప్రదానం చేసి ఘనంగా సన్మానించారు.

​ఈ సందర్భంగా చింతాబాబు మాదిగ మాట్లాడుతూ.. 1990 నుండి నేటి వరకు సుదీర్ఘంగా 35 సంవత్సరాలుగా ఎమ్మార్పీఎస్ ఉద్యమంలో కొనసాగుతూ జాతికి సేవ చేస్తున్నానని తెలిపారు. మార్గదర్శి యూత్ స్ఫూర్తి, స్వచ్ఛంద దళిత ఉద్యమ కార్యక్రమాలలో తాను చేసిన సామాజిక సేవలను గుర్తించి జాతీయ బహుజన సాహిత్య అకాడమీ ఈ అవార్డు అందించడం ఎంతో సంతోషంగా ఉందన్నారు. గతంలో తెలంగాణ రాష్ట్ర స్థాయిలో ‘దళిత రత్న మాదిగ’ బిరుదును అందుకున్నానని, నేడు జాతీయ స్థాయిలో అంబేద్కర్ అవార్డు రావడం గర్వకారణమని పేర్కొన్నారు. ఈ అవార్డు అందించిన అకాడమీ జాతీయ అధ్యక్షుడు నల్ల రాధాకృష్ణకు, తనకు నిరంతరం సహకరిస్తున్న ఎమ్మార్పీఎస్ జాతీయ అధ్యక్షుడు మేడి పాపయ్య మాదిగ, రాష్ట్ర అధ్యక్షుడు కేదాసి మోహన్ మాదిగలకు, తన సొంత ప్రాంత ప్రజలకు ఎల్లప్పుడూ రుణపడి ఉంటానని ఆయన కృతజ్ఞతలు తెలిపారు.

Comments (0)

User