గుడ్డి దర్బార్‌

• టౌన్‌ ప్లానింగ్‌లో కాసుల బేరం

• నిబంధనలకు విరుద్ధంగా నిర్మించిన భవనానికి అనుమతులు

• షార్ట్‌ఫాల్‌లో ఉన్న దరఖాస్తును గుట్టుగా అనుమతిస్తూ ఉత్తర్వులు

• చక్రం తిప్పిన మాజీ ఎమ్మెల్యే అనుచరుడు, స్థానిక కాంగ్రెస్‌ నేత

• భారీగా డబ్బులు చేతులు మారినట్లు పెద్ద ఎత్తున

• ‘మల్కాజిగిరి మున్సిపల్‌’ ఏసీపీ, డీసీల పాత్రపై అనేక ఆరోపణలు

– సిటీబ్యూరో, నవంబర్‌ 10 (నమస్తే తెలంగాణ ) : నిబంధనలు సరిగా లేవంటూ నిర్మాణదారుడికి షార్ట్‌ఫాల్‌ లెటర్‌..అప్పటికే రెండు అంతస్తుల నిర్మాణం..రెండు నెలల్లో సీన్‌ రివర్స్‌… మళ్లీ దరఖాస్తు..కట్టిన భవనానికి అనుమతిమంజూరు చేస్తూ టౌన్‌ ప్లానింగ్‌ అధికారుల ఉత్తర్వులు.. ఎంఎంసీ పరిధిలోని మల్కాజిగిరి మున్సిపల్‌ సర్కిల్‌ టౌన్‌ ప్లానింగ్‌ అధికారుల తీరిది. నిబంధనలను పాతిపెట్టి, సకల అధికారాలను గంగలో కలిపేస్తూ అధికారుల చుట్టూ ‘కాసుల బేరం’ జోరుగా సాగుతోంది. ఎలాంటి అనుమతులు లేకుండా నిబంధనలకు విరుద్ధంగా అప్పటికే నిర్మాణం పూర్తి చేసుకున్న ఓ భవనానికి గుట్టు చప్పుడు కాకుండా అనుమతులు ఇచ్చిన తీరు ప్రస్తుతం చర్చనీయాంశంగా మారింది.

మల్కాజిగిరి సర్కిల్‌ -5లోని వెంకటేశ్వర నగర్‌ కాలనీలో ఒకే నిర్మాణానికి రెండు ఫైల్‌ నంబర్లు ( 079810/ 046811) సృష్టించడమే కాకుండా.. షార్ట్‌ఫాల్‌లో ఉన్న నిర్మాణానికే చకచకా అనుమతులు ఇచ్చిన తీరు గమనార్హం. కనీసం సైట్‌ను క్షేత్రస్థాయిలో పరిశీలించకుండానే టౌన్‌ ప్లానింగ్‌ ఏసీపీ అనుమతి ఇవ్వడం వెనుక అనేక ఆరోపణలు వ్యక్తమవుతున్నాయి. స్థానిక మాజీ ఎమ్మెల్యే అనుచరుడు, కాంగ్రెస్‌ నేత అన్నీ తానై ఈ వ్యవహారాన్ని చక్కదిద్ది..భారీ ఎత్తున ముడుపులు చేతులు మారినట్లు ప్రచారం సాగుతున్నది. సామాన్యుడి అనుమతులకు ముప్పుతిప్పలు పెట్టే అధికారులు ఏం చూడకుండానే అనుమతులు మంజూరు చేశారా అన్న అనుమానాలు వ్యక్తమవుతున్నాయి.

అప్పుడు షార్ట్‌ఫాల్‌… ఇప్పుడు ఓకే

వెంకటేశ్వరనగర్‌కాలనీలో ఓ నిర్మాణదారుడు మూడు అంతస్తులకు అనుమతి కోసం దరఖాస్తు చేసుకున్నారు. నిబంధనల మేరకు పత్రాలు లేకపోవడంతో మల్కాజిగిరి మున్సిపల్‌ అధికారులు షార్ట్‌ఫాల్‌ పంపించారు. అప్పటికే నిర్మాణదారుడు రెండు అంతస్తులకు స్లాబ్‌ పూర్తిచేశారు. ఈ క్రమంలో షార్ట్‌పాల్‌కు తగిన పత్రాలు సమర్పించాలన్న, సమస్య పరిష్కరించడానికి వీలులేకుండా నిర్మాణం కట్టడంతో అధికారులు అనుమతులు మంజూరు చేయలేదు. దీనికి తోడు కొంతమంది టౌన్‌ప్లానింగ్‌ అధికారులకు ఈ నిర్మాణంపై సోషల్‌ మీడియా ద్వారా పలువురు ఫిర్యాదు చేశారు. మళ్లీ అనుమతులు మంజూరు చేస్తున్నారని, ఇప్పటికే నిర్మాణం పూర్తి చేశారని పేర్కొంటూ.. ఫిర్యాదు చేశారు. అయినా అధికారులు ముందుకు వెళ్లిన తీరు చర్చకు దారి తీసింది.

అనుమతులపై అనేక అనుమానాలు

వెంకటేశ్వరకాలనీలో అక్టోబర్‌ 31న మూడు అంతస్తులకు అనుమతులు మంజూరు చేశారు. ఆ వెంటనే గతంలో ఉన్న రెండు అంతస్తుల పైన మరో అంతస్తు నిర్మాణాన్ని నిర్మాణదారుడు ప్రారంభించాడు. ఈ విషయం తెలిసిన ఫిర్యాదుదారులు అధికారులను సంప్రదించగా, రెస్పాన్స్‌ రాలేదు. అనుమతులపై ఆరా తీయగా గతంలో నిర్మించిన ఇంటి నంబర్‌, ప్లాట్‌కే అనుమతులు మంజూరు చేసినట్లు గుర్తించారు. టౌన్‌ ప్లానింగ్‌ అధికారులు ఈ విషయంపై స్పందించకపోవడం గమనార్హం. ఉన్నతాధికారులు మాత్రం తమకు తెలియదని, కిందిస్థాయి అధికారులే బాధ్యతని తెలుపడం కొసమెరుపు. సైట్‌ సందర్శించకుండానే టౌన్‌ప్లానింగ్‌ ఏసీపీ, డీసీలు అనుమతిపై సంతకం చేయడంపై అనుమానాలు వ్యక్తమవుతున్నాయి.