‘ఇట్లు అర్జున’ చూసి సర్‌ప్రైజ్‌ అయ్యాను

‘హీరో అనీష్‌ నాకు ఈ సినిమా గ్లింప్స్‌ చూపించి వాయిస్‌ఓవర్‌ ఇవ్వమని అడిగాడు. కథ అడిగాను.. చెప్పాడు. కథలో తను మూగవాడు. ఫస్ట్‌ సినిమాకే మూగవాడిగా చేయడం అవసరమా? అని అడిగాను. ఎందుకంటే.. రామ్‌చరణ్‌కి డఫ్‌ క్యారెక్టర్‌ చేయడానికి పదేళ్లు పట్టింది. ‘రంగస్థలం’లో తను డఫ్‌గా నటించాడు. అఖిల్‌ కూడా అనుభవం వచ్చాకే ‘లెనిన్‌’లో బ్లైండ్‌ క్యారెక్టర్‌ చేశాడు. కానీ అనీష్‌కి ఇది తొలి సినిమా. సినిమా పూర్తయ్యాక చూపించారు. నిజంగా సర్‌ప్రైజ్‌ అయ్యాను.

అద్భుతంగా చేశాడు. అనీష్‌ తన కళ్లతో మాట్లాడాడు. నిశ్శబ్దం ఎంత పవర్‌ఫుల్‌గా ఉంటుందో చెబుతుంది ఈ సినిమా. అనీష్‌, అనస్వర కెమిస్ట్రీ అద్భుతం. ప్రతి క్రాఫ్ట్‌ మనసుపెట్టి పనిచేశారు. రేపు అది ప్రేక్షకులు తెరపై చూస్తారు’ అని అగ్ర కథానాయకుడు అక్కినేని నాగార్జున అన్నారు. ఆయన సమర్పకునిగా రూపొందిన చిత్రం ‘ఇట్లు అర్జున’. అనీష్‌ కథానాయకుడు. అనస్వర రాజన్‌ కథానాయిక. మహేశ్‌ ఉప్పల దర్శకుడు. వెంకీ కుడుముల నిర్మాత. ఈ చిత్ర సంగీత విభావరి సోమవారం హైదరాబాద్‌లో జరిగింది.

ఈ కార్యక్రమానికి విచ్చేసిన నాగార్జున పై విధంగా స్పందించారు. కార్యక్రమానికి అతిథిగా విచ్చేసిన ఆగ్ర హీరో రామ్‌చరణ్‌ మాట్లాడుతూ ‘నాగార్జునగారు ఈ ప్రాజెక్ట్‌లోకి ఎంటరవ్వడంతో సినిమాకు బలం చేకూరింది. కొత్త వాళ్లను ఆయన ప్రోత్సహించినంతగా ఎవరూ ప్రోత్సహించలేరు. వెంకీ కుడుములకు, డైరెక్టర్‌ మహేష్‌కీ, అనస్వరకీ నా శుభాకాంక్షలు. తమన్‌ అద్భుతమైన సంగీతం అందించారు. తొలి సినిమా ‘చిరుత’లో నేనెలా చేశానో తెలీదుకానీ.. తన తొలి సినిమా అయిన ‘ఇట్లు అర్జన’లో నాకంటే వందశాతం గొప్పగా చేశాడు అనీష్‌. తనకు బిగ్గెస్ట్‌ ఫ్యూచర్‌ ఉంది’ అని నమ్మకంగా చెప్పారు రామ్‌చరణ్‌. ఇంకా అక్కినేని అఖిల్‌తోపాటు చిత్రబృందమంతా మాట్లాడారు.