‘ఇంకుడు గుంతల నిర్మాణంతో భూగర్భ జలాలు పెంపు’

– బూర్గంపహాడ్ ఎంపీడీవో జమలారెడ్డి

బూర్గంపహాడ్, నవంబర్ 11 : ఇంకుడు గుంతల నిర్మాణంతో భూగర్భ జలాలు పెంపొందించుకోవచ్చని బూర్గంప‌హాడ్‌ ఎంపీడీవో జమలారెడ్డి అన్నారు. బుధవారం మండల పరిధిలోని నాగినేనిప్రోలు రెడ్డిపాలెం గ్రామంలో జలసిరి కార్యక్రమంలో భాగంగా సర్పంచ్ బానోతు సరోజ ఆధ్వర్యంలో ఇంకుడు గుంతల నిర్మాణ పనులు ప్రారంభించారు. ఈ సందర్భంగా ఎంపీడీవో మాట్లాడుతూ.. ప్రతి ఊరికి ఊట కుంట… ప్రతి పంట పొలానికి పంట కుంట… ప్రతి ఇంటికి ఇంకుడు గుంత నినాదంతో ప్రభుత్వం జలసిరి కార్యక్రమాన్ని తీసుకు వచ్చిందన్నారు. వర్షపు నీటిని వృథా కానీయకుండా భూమిలో ఇంకేలా చేయడంతో పాటు భూగర్భ జలాలను సంరక్షించడం, భవిష్యత్‌లో నీటి కొరతను నివారించడం ఈ కార్యక్రమం ప్రధాన లక్ష్యమన్నారు. గ్రామంలో 20 ఇంకుడు గుంతలు మంజూరు అవ‌గా వాటి నిర్మాణ పనులు చేపట్టడం జరుగుతుందన్నారు. జల సంరక్షణలో ఆదర్శ గ్రామ పంచాయతీగా తీర్చిదిద్దేందుకు ప్రతి ఒక్కరూ భాగస్వాములై ఇంకుడు గుంతలను నిర్మించుకోవాలని సూచించారు. ఈ కార్యక్రమంలో ఉప సర్పంచ్ అప్పిరెడ్డి శ్రీనివాసరెడ్డి, కార్యదర్శి రవి, వార్డు సభ్యులు పాల్గొన్నారు.