YS Jagan | ప్రతి మత్స్యకార కుటుంబానికి అండగా ఉంటా : వైఎస్ జగన్ మోహన్రెడ్డి

అమరావతి : ప్రతి మత్స్యకార ( Fisherman) కుటుంబం ఆర్థికంగా ఎదగాలని, వారి బిడ్డల భవిష్యత్తు ఉజ్వలంగా ఉండేందుకు ఎల్లవేళలా అండగా ఉంటానని వైసీపీ అధ్యక్షుడు, మాజీ సీఎం వైఎస్ జగన్ మోహన్రెడ్డి (YS Jagan Mohan Reddy) తెలిపారు.
సముద్రాన్నే నమ్ముకుని జీవనం సాగిస్తున్న గంగపుత్రులకు ట్విటర్ ద్వారా ప్రపంచ మత్స్యకార దినోత్సవ శుభాకాంక్షలు తెలిపారు. ఎన్ని ఆటుపోట్లు ఎదురైనా మొక్కవోని ధైర్యంతో ముందుకు సాగుతూ అహర్నిశలు శ్రమించే వారి జీవితం ఎంతో స్ఫూర్తిదాయకమని పేర్కొన్నారు. మత్స్యకారుల జీవితాల్లో అభ్యున్నతి తీసుకురావాలనే లక్ష్యంతో వైసీపీ ప్రభుత్వ హయాంలో వారి సంక్షేమం, అభివృద్ధికి పెద్దపీట వేశామని వివరించారు.
వివిధ పథకాల ద్వారా రూ.4,913 కోట్ల మేర లబ్ధి చేకూర్చామని వెల్లడించారు. మత్స్యకారులకు మెరుగైన వసతులు, ఉపాధి అవకాశాలు కల్పించేందుకు రూ.3,793 కోట్లతో 10 ఫిషింగ్ హార్బర్లు, 6 ఫిష్ ల్యాండింగ్ సెంటర్ల నిర్మాణాన్ని చేపట్టామని, రూ.16 వేల కోట్లతో 4 పోర్టుల నిర్మాణానికి శ్రీకారం చుట్టామని తెలిపారు. ఓఎన్జీసీ పైప్లైన్ కారణంగా జీవనోపాధి కోల్పోయిన 3,458 మత్స్యకార కుటుంబాలకు రూ.161.86 కోట్ల పరిహారం అందించామని గుర్తు చేశారు.
Comments (0)