Yadagirigutta | కార్తీక మాసం.. ఆదివారం సెలవు.. యాదగిరిగుట్టకు పోటెత్తిన భక్తులు!

Yadagirigutta | కార్తీక మాసం.. అందులోనూ ఆదివారం సెలవుదినం కావడంతో యాదగిరిగుట్ట శ్రీ లక్ష్మీనరసింహస్వామి ఆలయానికి భక్తులు పోటెత్తారు. స్వామివారి దర్శనం కోసం తెల్లవారుజాము నుంచే భక్తులు బారులు తీరారు. దీంతో ఆలయ పరిసరాలు భక్తులతో కిటకిటలాడాయి. కొండపైకి వెళ్లే వాహనాలు సైతం బారులు తీరడంతో రద్దీ నెలకొంది.
కార్తీక మాసం కావడంతో భక్తులు స్వామివారి దర్శనంతో పాటు ప్రత్యేక పూజలు, వ్రతాలు నిర్వహించారు. ఈ క్రమంలో సత్యనారాయణ స్వామి వ్రత మండపంలో భక్తుల సందడి నెలకొంది. పెద్ద సంఖ్యలో భక్తులు వ్రత పూజల్లో పాల్గొని మొక్కులు చెల్లించుకున్నారు. కొండపైన ఉన్న మండపాల్లో దీపారాధన చేసి లక్ష్మీనరసింహస్వామిని దర్శించుకున్నారు.
మరోవైపు కొండపైకి వెళ్లే వాహనాల రద్దీ పెరగడంతో ఆలయ అధికారులు అవసరాన్ని బట్టి వాహనాలను అనుమతిస్తున్నారు. క్యూలైన్లు, వ్రత మండపాలు, కొండపైన పరిసరాలు భక్తులతో నిండిపోయాయి. ధర్మదర్శనానికి సుమారు మూడు గంటల సమయం పడుతోందని ఆలయ అధికారులు వెల్లడించారు.

Yadagirigutta2
Comments (0)