Washington hair | అమెరికా తొలి అధ్యక్షుడి జట్టు వేలం.. మూడు వెంట్రుకల ధర 3.7 లక్షలు..!

Washington hair : అమెరికా తొలి అధ్యక్షుడు (US President) జార్జి వాషింగ్టన్ (George Washington) వెంట్రుకలు భద్రపర్చిన లాకెట్ వేలంలో భారీ ధర పలికింది. కేవలం మూడు వెంట్రుకలు మాత్రమే ఉన్న ఆ లాకెట్ ఏకంగా 4,000 డాలర్లకు (మన కరెన్సీలో రూ.3.7 లక్షలకు) అమ్ముడుపోయింది. వాషింగ్టన్ మృతిచెందిన తర్వాతనో, మృతికి ముందుగానో అతడి మూడు వెంట్రుకలను ఆ లాకెట్లో భద్రపర్చినట్లు కుటుంబ వారసులు తెలిపారు.
జార్జి వాషింగ్టన్కు సన్నిహిత వ్యక్తుల్లో ఒకరైన జాన్ గాడ్స్బై అనే వ్యక్తి 1799 లో వర్జినీయాలోని అలెగ్జాండ్రియా నగరంలో వాషింగ్టన్కు చివరి డిన్నర్ ఇచ్చారు. అదేఏడాది వాషింగ్టన్ కన్నుమూశారు. తాజాగా వేలం వేసిన లాకెట్ జాన్ గాడ్స్బై నుంచి ఆయన మనవరాలైన జులియా టెన్ మెక్ బ్లేయర్కు వచ్చినట్లు రిచ్మాండ్ ఆక్షన్ హౌస్ తెలిపింది. దాన్ని కొన్నేళ్లు ఆమె ఇంట్లోని వాషింగ్టన్ చిత్రం వద్ద వేలాడదీశారు.
ఆ తర్వాత లాకెట్ పురాతన వస్తువులు సేకరించే జాన్ కె లాటిమర్ వద్దకు చేరింది. కాగా, తమకు ఇష్టమైన వారి వెంట్రుకలు సేకరించి లాకెట్ల వంటి వాటిల్లో ఉంచి ప్రదర్శించడం అమెరికాలో పాపులర్ ట్రెండ్. ఇది వాషింగ్టన్ కుటుంబంలో కూడా ఉందని మౌంట్ వెర్నన్ వెబ్సైట్ వెల్లడించింది. 2021లో వాషింగ్టన్కు చెందిన ఇలాంటి లాకెట్ 40 వేల డాలర్లకు (రూ.37 లక్షలకు) అమ్ముడుపోయింది. వాషింగ్టన్ సంతకం చేసిన లేఖ ఏకంగా వేలంలో 1,09,800 డాలర్లు పలకడం విశేషం.
Comments (0)