Victory | గుండెపోటుతో మృతి చెందిన ఎంపీటీసీ అభ్యర్థి విజయం

అమరావతి : తూర్పుగోదావరి జిల్లా దేవరపల్లి మండలం ధుమంతునిగూడెంలో గుండెపోటుతో మరణించిన జనసేన ( Janasena ) ఎంపీటీసీ అభ్యర్థి గారపాటి దివ్య (28) ( Divya ) ఎన్నికల ఫలితాల్లో 350 ఓట్ల మెజారిటీతో విజయం( Victory ) సాధించారు. శుక్రవారం పోలింగ్‌ రోజున దివ్య అస్వస్థతకు గురయ్యారు. దీంతో కుటుంబ సభ్యులు వెంటనే ఆమెను రాజమహేంద్రవరంలోని ఓ ప్రైవేట్ ఆసుపత్రికి తరలించారు.

అక్కడ చికిత్స పొందుతూ గుండెపోటుతో ఆమె మృతి చెందినట్లు కుటుంబ సభ్యులు, జనసేన పార్టీ నాయకులు వెల్లడించారు. కూటమి తరఫున ఎంపీటీసీ అభ్యర్థిగా బరిలోకి దిగిన దివ్య.. ఎన్నికల్లో విజయం సాధించేందుకు ఎంతో కష్టపడ్డారని కుటుంబ సభ్యులు తెలిపారు. ఎన్నికల కోసం ఎంతో శ్రమించిన ఆమె.. ఫలితం చూసుకోకుండానే కన్నుమూయడంతో కుటుంబ సభ్యులు కన్నీరుమున్నీరుగా విలపించారు.