Train Derail | అస్సాంలో ప‌ట్టాలు త‌ప్పిన కోల్‌క‌తా-సైరంగ్ ఎక్స్‌ప్రెస్.. ప‌లువురికి గాయాలు..!

Train Derail : అస్సాంలో కోల్‌కతా-సైరంగ్‌ ఎక్స్‌ప్రెస్‌ (Kolkata-Sairang Express) రైలు ప‌ట్టాలు త‌ప్పింది. అస్సాం (Assam) లోని కామ్‌రూప్‌ జిల్లా డిగార్‌ రైల్వేస్టేషన్‌ (Digar Railway Station) వద్ద ఈ ప్ర‌మాదం జ‌రిగింది. ఈ ఘ‌ట‌న‌లో ఆరు బోగీలు పట్టాలు తప్పాయి. ఇవాళ (బుధ‌వారం) ఉదయం 6.54 గంట‌ల సమయంలో ఈ ప్ర‌మాదం జ‌రిగింద‌ని రైల్వే అధికారులు వెల్లడించారు. ప్రమాదంలో పలువురికి గాయాల‌య్యాయి. ఇప్పటికే సీనియర్‌ అధికారులు ఘటనా స్థలానికి చేరుకుని ప‌రిస్థితిని స‌మీక్షిస్తున్నారు.

గువాహటికి 30 కిలోమీటర్ల దూరంలో ఈ ఘటన చోటుచేసుకుంది. ప్రమాదంలో ఇంజిన్‌తో సహా ఆరు కోచ్‌లు పట్టాలు తప్పాయి. గువాహటి స్టేషన్‌ నుంచి బయల్దేరిన కొద్దిసేపటికే రైలు ప్రమాదానికి గురైంది. ఈ రైలు మంగళవారం ఉదయం కోల్‌కతా స్టేషన్‌ నుంచి బయల్దేరింది. ఇవాళ‌ మధ్యాహ్నానికి మిజోరంలోని సైరంగ్‌కు చేరుకోవాల్సి ఉంది. ఈ రైలు ఒక లైన్‌ నుంచి మరో లైన్‌కు మారుతున్న వేళ తలెత్తిన సాంకేతిక సమస్య కారణంగా పట్టాలు తప్పి ఉండవచ్చని అధికారులు అనుమానిస్తున్నారు.