Tamil Nadu | ఐఫోన్ ఫ్యాక్ట‌రీలో ప్ర‌మాదం.. ఊపిరాడ‌క ముగ్గురు కార్మికులు దుర్మ‌ర‌ణం

Tamil Nadu : తమిళనాడు రాష్ట్రం (Tamil Nadu State) హోసూర్‌ (Hossur) సమీపంలో ఉన్న ఐఫోన్‌ విడి భాగాల తయారీ ప్లాంట్‌ (iPhone factory) లో విషాదం చోటుచేసుకుంది. ఈ ఫ్యాక్టరీలో పనిచేస్తున్న ముగ్గురు కార్మికులు ఊపిరాడ‌క మరణించారు. విషపూరిత వాయువులు పీల్చి ఊపిరాడ‌కపోవ‌డ‌మే వారి మరణాలకు కారణమని పోలీసులు ప్రాథమికంగా అంచ‌నా వేశారు. మెయింటనెన్స్‌ విభాగంలో పనిచేస్తున్న వీరు సోమవారం వ్యర్థజలాల (Waste Water) శుద్ధీకరణ ట్యాంక్‌ వద్ద ఉండగా ఈ ఘటన చోటుచేసుకుంది.

తొలుత ఓ కార్మికుడు ట్యాంకు లోపలికి తొంగిచూసే క్రమంలో ఉన్నట్టుండి కుప్పకూలాడు. అతడికి ఏం జరిగిందో తెలుసుకునేందుకు వెళ్లిన క్రమంలో మరో ఇద్దరు కార్మికులు స్పృహ కోల్పోయారు. తోటి సిబ్బంది వారిని వెంటనే సమీపంలోని ఆస్ప‌త్రికి తరలించగా అప్పటికే ఆ ముగ్గురూ ప్రాణాలు కోల్పోయారు. ఈ ప్లాంట్‌ను టాటా ఎలక్ట్రానిక్స్‌ నిర్వహిస్తున్న‌ది. తాజా ఘటనపై ఈ కంపెనీ నుంచి గానీ, యాపిల్‌ నుంచి గానీ ఎలాంటి ప్రకటన రాలేదు.

అయితే ఈ ఘటనపై కంపెనీ అంతర్గత దర్యాప్తు చేపట్టినట్లు సమాచారం. పోస్ట్‌మార్టం నివేదిక తర్వాతే మరణాలకుగల అసలు కారణం తెలుస్తుందని పోలీసు అధికారులు వెల్లడించారు.