Suicide: వీడియోకాల్‌లో గ‌ర్ల్‌ఫ్రెండ్‌తో మాట్లాడుతూ బాయ్‌ఫ్రెండ్ సూసైడ్‌.. ఆ త‌ర్వాత ఆమె కూడా

కోల్‌క‌తా: ప‌శ్చిమ బెంగాల్‌లో ఓ యువ జంట బ‌ల‌వ‌న్మ‌ర‌ణాని(Suicide)కి పాల్ప‌డింది. గ‌ర్ల్‌ఫ్రెండ్‌తో వాట్సాప్ వీడియోకాల్‌లో మాట్లాడుతూనే.. 18 ఏళ్ల యువ‌కుడు ఉరివేసుకుని ఆత్మ‌హ‌త్య చేసుకున్నాడు. లైవ్‌లో ఆ ఘ‌ట‌న చూసిన ఆ అమ్మాయి కూడా ఇంట్లో ఆత్మ‌హ‌త్య‌కు పాల్ప‌డింది. ఈ ఘ‌ట‌న‌కు చెందిన వివ‌రాలు ఇలా ఉన్నాయి. జీత్ బిశ్వాస్‌, పూజా మోండల్‌.. ఇద్ద‌రూ 18 ఏళ్లు ఉంటారు. నార్త్ 24 ప‌ర‌గ‌నాస్‌లోని అశోక్‌న‌గ‌ర్‌లో ఉన్న సెందంగ చ‌తుర్‌దాస్‌ప‌ల్లి హై స్కూల్‌లో 12వ త‌ర‌గ‌తి చ‌దువుతున్నారు. ఆ ఇద్ద‌రూ ఒకే ద‌గ్గ‌ర ట్యూష‌న్ వెళ్లేవారు. పూజాకు జీత్ వీడియో కాల్ చేశాడ‌ని, అత‌ను సీలింగ్‌కు ఉరి వేసుకోగానే, అది చూసిన పూజా కూడా ఉరి వేసుకున్న‌ట్లు పోలీసులు చెప్పారు.

పూజ ఇంట్లోవాళ్లు ఆమె కోసం త‌లుపును ప‌గుల‌గొట్టారు. అయితే ఉరి వేసుకున్న పూజాను చూసి కుటుంబ‌స‌భ్యులు షాక్ అయ్యారు. ఇంకా అప్ప‌టికి ఆమె వాట్సాప్ వీడియోకాల్ ఆన్‌లో ఉన్న‌ట్లు గుర్తించారు. ఆ స్క్రీన్‌లో ఓ అబ్బాయి ఉరి వేసుకుని ఉన్న‌ట్లు గుర్తించామ‌న్నారు. ఆ వీడియో కాల్ ఆధారంగానే పూజ ల‌వ్‌లో ఉన్న‌ట్లు తెలుసుకున్న‌ట్లు కుటుంబ‌స‌భ్యులు వెల్ల‌డించారు.

జిల్లా పోలీసులు ఇద్ద‌రి మృత‌దేహాల‌ను ఆస్ప‌త్రికి త‌ర‌లించారు. అయితే జీత్‌, పూజా చాన్నాళ్లుగా రిలేష‌న్‌లో ఉన్న‌ట్లు క్లాస్‌మేట్స్ చెప్పారు. జీత్ ఇంట్లో పెళ్లికి వ్య‌తిరేకంగా ఉన్న‌ట్లు తెలిసింద‌ని ఓ విద్యార్థి తెలిపారు. కానీ పూజ ఇంట్లో ఆ అబ్బాయి గురించి ఏమీ తెలియ‌ద‌న్నారు. పోలీసులు కేసు న‌మోదు చేసి విచారిస్తున్నారు.