Sonu Sood | విమాన భద్రతపై సోనూసూద్‌ కీలక సూచనలు.. కాక్‌పిట్‌ కోసం అత్యవసర కోడ్‌ ఉండాలంటూ..

Sonu Sood | దుబాయ్‌ నుంచి ఇజ్రాయెల్‌కు వెళ్తున్న ఫ్లైదుబాయ్‌ విమానంలో ఇటీవల చోటుచేసుకున్న ఘటనపై నటుడు సోనూసూద్‌ స్పందించారు. విమానాల్లో అత్యవసర పరిస్థితులు ఎదురైనప్పుడు ప్రయాణికులు, సిబ్బంది భద్రతకు మరింత మెరుగైన చర్యలు అవసరమని ఆయన అభిప్రాయపడ్డారు. ముఖ్యంగా కాక్‌పిట్‌ భద్రత విషయంలో అదనపు అత్యవసర వ్యవస్థను అందుబాటులోకి తీసుకురావాలని విమానయాన సంస్థలకు సూచించారు. ఈ మేరకు సోనూసూద్‌ సామాజిక మాధ్యమం ‘ఎక్స్‌’ వేదికగా తన అభిప్రాయాలను వెల్లడించారు. ఇటీవల చోటుచేసుకున్న ఘటనలు విమానయాన భద్రత అనేది నిరంతరం అభివృద్ధి చెందాల్సిన అంశమని గుర్తు చేస్తున్నాయని పేర్కొన్నారు. కాక్‌పిట్‌లోకి ప్రవేశానికి సంబంధించిన భద్రతా విధానాలను మరోసారి సమీక్షించి, అత్యవసర పరిస్థితుల్లో ఉపయోగపడే అదనపు భద్రతా చర్యలను విమానయాన సంస్థలు పరిశీలించాలని కోరారు.

కాక్‌పిట్‌లో ఉన్న పైలట్లు ఏదైనా అత్యవసర పరిస్థితి కారణంగా తలుపు తెరవలేని పరిస్థితి ఏర్పడితే.. బయట ఉన్న సిబ్బంది సహాయం చేసేందుకు వీలుగా ప్రత్యామ్నాయ భద్రతా విధానం ఉండాలని సోనూసూద్‌ సూచించారు. కాక్‌పిట్‌ తలుపును తెరవడానికి ఉపయోగించే అత్యవసర కోడ్‌ను బయట ఉన్న విశ్వసనీయ సిబ్బందిలో ఒకరి వద్ద భద్రంగా ఉంచే విధానాన్ని పరిశీలించవచ్చని అన్నారు. అయితే, ఆ కోడ్‌ సాధారణ పరిస్థితుల్లో ఉపయోగించకుండా, కేవలం అత్యవసర సందర్భాల్లో మాత్రమే అమలు చేసేలా కఠినమైన నిబంధనలు ఉండాలని స్పష్టం చేశారు. అత్యవసర పరిస్థితుల్లో పైలట్‌ స్పందించలేని సందర్భాల్లో బయట ఉన్న సిబ్బంది పూర్తిగా నిస్సహాయంగా మారకుండా ఉండేందుకు ఇలాంటి వ్యవస్థ ఉపయోగపడుతుందా అనే కోణంలో విమానయాన సంస్థలు ఆలోచించాలని ఆయన కోరారు.

ఇటీవల దుబాయ్‌ నుంచి ఇజ్రాయెల్‌కు బయల్దేరిన ఫ్లైదుబాయ్‌ విమానంలో కాక్‌పిట్‌లో తీవ్ర ఉద్రిక్త పరిస్థితి ఏర్పడింది. విమానం ప్రయాణిస్తున్న సమయంలో కోపైలట్‌ కెప్టెన్‌పై దాడికి ప్రయత్నించినట్లు, ఈ ఘటనలో కెప్టెన్‌ గాయపడినట్లు సమాచారం వెలువడింది. పరిస్థితి అదుపు తప్పడంతో విమానాన్ని సౌదీ అరేబియాలో అత్యవసరంగా దించాల్సి వచ్చింది. విమానంలో ప్రయాణిస్తున్న సమయంలోనే కాక్‌పిట్‌లో చోటుచేసుకున్న ఈ ఘటన విమాన భద్రతపై తీవ్ర చర్చకు దారితీసింది. ఈ నేపథ్యంలోనే సోనూసూద్‌ కాక్‌పిట్‌ భద్రతా వ్యవస్థపై తన సూచనలను వెల్లడించారు. పైలట్‌లు అత్యవసర పరిస్థితుల్లో స్పందించలేని సందర్భాల్లో బయట ఉన్న సిబ్బంది ప్రయాణికుల భద్రత కోసం అవసరమైన చర్యలు తీసుకునేలా అదనపు వ్యవస్థలు ఉండాల్సిన అవసరాన్ని ఆయన ప్రస్తావించారు.