Semaglutide | స‌న్ ఫార్మాకు కీల‌క అనుమ‌తి.. ఇక సెమాగ్లుటైడ్ ఔష‌ధం ట్యాబ్లెట్ల రూపంలో..

Semaglutide | సన్ ఫార్మాసూటికల్ ఇండస్ట్రీస్ సంస్థకు భారత్‌లో రోజుకు ఒకసారి తీసుకునే జనరిక్ సెమాగ్లుటైడ్ ట్యాబ్లెట్ల‌ను తయారు చేసి విక్రయించేందుకు కేంద్ర ఔషధ ప్రమాణ నియంత్రణ సంస్థ (సీడీఎస్‌సీఓ) అనుమతి ఇచ్చింది. ఈ ట్యాబ్లెట్ల‌ను టైప్‌-2 మధుమేహం చికిత్సలో రక్తంలోని చక్కెర స్థాయిలను నియంత్రించేందుకు ఉపయోగిస్తారు. నోవో నార్డిస్క్ సంస్థ తయారుచేసే రైబెల్సస్‌ ఔషధానికి ఇది చికిత్సాపరంగా సమానమైనదిగా పేర్కొన్నారు. ఈ ట్యాబ్లెట్ల‌కు 3, 7, 14 మిల్లీగ్రాముల మూడు మోతాదుల్లో అనుమతి లభించింది. పునఃసంయోజక డీఎన్‌ఏ సాంకేతికత ఆధారంగా తయారయ్యే ఈ ఔషధాన్ని అసోంలోని కామ్రూప్‌లో ఉన్న సన్‌ ఫార్మా తయారీ కేంద్రంలో ఉత్పత్తి చేయనున్నారు.

కంపెనీల మ‌ధ్య పోటీ..

ఈ ట్యాబ్లెట్ల‌లో ఉపయోగించే క్రియాశీల ఔషధ పదార్థాన్ని చైనాలోని హాంగ్‌జౌ ప్రాంతానికి చెందిన ఝోంగ్‌మేయ్‌హువాడోంగ్‌ ఫార్మాసూటికల్‌ సంస్థ నుంచి సేకరించనున్నారు. 2026 ప్రారంభంలో సెమాగ్లుటైడ్‌ ఔషధ పేటెంట్‌ గడువు ముగియడంతో భారతీయ ఔషధ సంస్థలు జనరిక్‌ రూపాలను మార్కెట్‌లోకి తీసుకొస్తున్నాయి. టొరెంట్‌ ఫార్మా సెమాలిక్స్‌, సెంబోలిక్‌ పేర్లతో జనరిక్‌ ట్యాబ్లెట్ల‌ను తొలుత అందుబాటులోకి తీసుకొచ్చింది. డాక్టర్‌ రెడ్డీస్‌ లేబొరేటరీస్‌ కూడా ఒబెడా పేరుతో ఈ ఔషధాన్ని విక్రయిస్తోంది. సన్‌ ఫార్మా ఇప్పటికే టైప్‌-2 మధుమేహం చికిత్సకు సెమాట్రినిటీ, దీర్ఘకాలిక బరువు నియంత్రణకు నోవెల్‌ట్రీట్‌ పేర్లతో సెమాగ్లుటైడ్‌ ఇంజెక్షన్లను అందిస్తోంది. ఇప్పుడు ట్యాబ్లెట్ల రూపంలోనూ అందుబాటులోకి తీసుకురావడంతో నోటి ద్వారా తీసుకునే, ఇంజెక్షన్‌ రూపంలోని రెండు రకాల చికిత్సలను అందించే అవకాశం ఏర్పడింది.

ధ‌ర‌లు ఎంత‌..

సన్‌ ఫార్మా కొత్త ట్యాబ్లెట్ల‌ ధరలను ఇంకా ప్రకటించలేదు. ప్రస్తుతం డాక్టర్‌ రెడ్డీస్‌ ఒబెడా ట్యాబ్లెట్ల‌ ధరలు 3 మిల్లీగ్రాములకు రూ.99, 7 మిల్లీగ్రాములకు రూ.135, 14 మిల్లీగ్రాములకు రూ.225గా ఉన్నాయి. గతంలో అధిక ధరల కారణంగా నోటి ద్వారా తీసుకునే సెమాగ్లుటైడ్‌ చికిత్స ప్రధానంగా పట్టణ ప్రాంతాల్లోని ఆర్థికంగా మెరుగైన వర్గాలకే పరిమితమైంది. అయితే, దేశీయ ఔషధ సంస్థల మధ్య పోటీ పెరగడంతో ఈ చికిత్స ధరలు తగ్గి మరింత మందికి అందుబాటులోకి వచ్చే అవకాశం ఉందని భావిస్తున్నారు.

ఎందుకు ఉప‌యోగిస్తారు..?

టైప్‌-2 మధుమేహం ఎక్కువగా ఉన్న భారత్‌లో ఈ ఔషధం అందుబాటులోకి రావడం చికిత్స విధానంలో మార్పునకు దారితీస్తుంద‌ని నిపుణులు చెబుతున్నారు. ఇంజెక్షన్లు తీసుకోవాల్సిన అవసరం లేకుండా ట్యాబ్లెట్ల‌ రూపంలో మందు లభించడం వల్ల కొందరికి చికిత్స ప్రారంభించడం సులభమవుతుంది. సెమాగ్లుటైడ్‌ హెచ్‌బీఏ1సీ స్థాయిలను గణనీయంగా తగ్గించడంతోపాటు బరువు తగ్గడానికీ తోడ్పడుతుంది. ఇది జీర్ణాశయం ఖాళీ అయ్యే వేగాన్ని తగ్గించి, ఎక్కువసేపు కడుపు నిండిన భావన కలిగిస్తుంది. తద్వారా ఇన్సులిన్‌ నిరోధకతకు దోహదపడే అంశాల్లో ఒకటైన అధిక బరువును నియంత్రించడంలో సహాయపడుతుంది. అయితే, ఈ ఔషధాన్ని వైద్యుల సూచనల మేరకే ఉపయోగించాలి.