Road Accident | రోడ్డు ప్రమాదంలో చిన్నారి దుర్మరణం..మరొకరికి తీవ్రగాయాలు

మేడ్చల్ : రోడ్డు ప్రమాదం ( Road Accident) లో చిన్నారి దుర్మరణం పాలైన సంఘటన మేడ్చల్ పోలీస్టేషన్ పరిధిలోని గౌడవెల్లి ( Goudavelli ) సమీపంలో జరిగింది. లారీ, ద్విచక్రవాహనాన్ని ఢీ కొట్టడంతో వెనుకాల కూర్చున్న ఐదు సంవత్సరాల రేవంత్ లారీ చక్రాల కింద నలిగి అక్కడికక్కడే మృతి చెందాడు.
స్థానికుల కథనం ప్రకారం..మెదక్ జిల్లా హవేళిఘనపూర్ మండలం శమ్నాపూర్కు చెందిన వసంత, వేణు దంపతులు బతుకుదెరువు కోసం మేడ్చల్కు వలస వచ్చి గుండ్లపోచంపల్లి డివిజన్ కండ్లకోయలో నివాసం ఉంటున్నారు. వారి నివాసం గృహం పక్కన ఉండే శ్రీనివాస్ బుధవారం సాయంత్రం గౌడవెల్లి పాఠశాలలో చదువుతున్న తమ కుమారుడిని తీసుకురావడానికి ద్విచక్ర వాహనంపై బయలుదేరగా ఆరుబయట ఆడుకుంటున్న రేవంత్ ( Revanth ) తాను వస్తానని మారాం చేయడంతో అతడిని వెంట తీసుకుని వెళ్లాడు .
కండ్లకోయ నుంచి గౌడవెల్లికి వెళ్తూ మేడ్చల్ గండిమైసమ్మ రోడ్డును దాటుతూ గౌడవెల్లి కమాన్ ప్రవేశించే సమయంలో మేడ్చల్ నుంచి గండిమైసమ్మకు ఇటుక లోడ్తో వెళ్తున్న లారీ ద్విచక్ర వాహనాన్ని ఢీ కొట్టింది. ఈ ఘటనలో చిన్నారి రేవంత్ కిందపడగా అతడిపై నుంచి లారీ చక్రాలు వెళ్లడంతో అక్కడికక్కడే మృతి చెందాడు. శ్రీనివాస్ గాయాలతో ప్రాణాపాయం నుంచి బయటపడ్డాడు. 108 అంబులెన్స్ ఆయనను చికిత్స నిమిత్తం తరలించారు. సమాచారం అందుకున్న రేవంత్ తల్లిదండ్రులు ఘటనా స్థలానికి చేరుకుని బోరుమంటూ విలపించడం చూపరులను కంటతడి పెట్టించింది. ఈ మేరకు పోలీసులు కేసు నమోదు చేసి, దర్యాప్తు చేస్తున్నారు.
Comments (0)