RC 17 | సుకుమార్‌ సినిమా కోసం రామ్‌ చరణ్‌ కొత్త లుక్‌.. బరువు తగ్గ‌డం కోసం ప్రత్యేక శిక్షణ!

21 November 2026 - 12:00
0 0
RC 17 | సుకుమార్‌ సినిమా కోసం రామ్‌ చరణ్‌ కొత్త లుక్‌.. బరువు తగ్గ‌డం కోసం ప్రత్యేక శిక్షణ!
Rc 17

RC 17 | మెగా పవర్‌స్టార్‌ రామ్‌ చరణ్‌ మరోసారి స్టార్‌ డైరెక్టర్‌ సుకుమార్‌తో కలిసి పనిచేయబోతున్నారు. ‘రంగస్థలం’ వంటి బ్లాక్‌బస్టర్‌ తర్వాత వీరిద్దరి కలయికలో రాబోతున్న ఈ ప్రాజెక్టుపై ఇప్పటికే భారీ అంచనాలు నెలకొన్నాయి. ఇటీవల విడుదలైన ఈ సినిమా కాన్సెప్ట్‌ పోస్టర్‌ ప్రేక్షకులను విశేషంగా ఆకట్టుకుంది. పౌరాణిక నేపథ్యాన్ని తలపించేలా రూపొందించిన పోస్టర్‌ సినిమాపై ఆసక్తిని మరింత పెంచింది. ఈ నేపథ్యంలో తన తదుపరి సినిమా కోసం రామ్‌ చరణ్‌ ఇప్పటి నుంచే సిద్ధమవుతున్నట్లు తెలుస్తోంది. ప్ర‌స్తుతం రామ్‌ చరణ్‌ తన శరీరాకృతి మార్చుకునే పనిలో ఉన్నారు. బుచ్చిబాబు దర్శకత్వంలో తెరకెక్కుతున్న ‘పెద్ది’ సినిమా కోసం ఆయన పొడవాటి జుట్టుతో ప్రత్యేకమైన లుక్‌లో కనిపిస్తున్నారు.

అయితే సుకుమార్‌ సినిమాకు పూర్తిగా భిన్నమైన రూపంలో కనిపించేందుకు సిద్ధమవుతున్నారు. ఇందులో భాగంగా బరువు తగ్గడంతో పాటు కొత్త పాత్రకు అవసరమైన శరీరాకృతిని సాధించేందుకు ప్రత్యేకంగా శ్రమిస్తున్నట్లు సమాచారం. ఈ సినిమా కోసం రామ్‌ చరణ్‌ ఒక ప్రత్యేకమైన ప్రదేశంలో శిక్షణ తీసుకుంటున్నట్లు ప్రచారం జరుగుతోంది. తన కొత్త పాత్రకు సరిపోయే లుక్‌, ఫిట్‌నెస్‌ సాధించడంపై ఆయన దృష్టి పెట్టినట్లు తెలుస్తోంది. అయితే ఈ మేకోవర్‌కు సంబంధించిన పూర్తి వివరాలు ఇంకా బయటకు రాలేదు. సుకుమార్‌-రామ్‌ చరణ్‌ కలయికలో రాబోతున్న ఈ సినిమా కాన్సెప్ట్‌ పోస్టర్‌ ఇప్పటికే సినీ వర్గాల్లో చర్చనీయాంశంగా మారింది. పోస్టర్‌లో కనిపించిన పౌరాణిక ఛాయలు ఈ సినిమా కథపై అనేక ఊహాగానాలకు తెరతీశాయి. గతంలో ‘రంగస్థలం’తో గ్రామీణ నేపథ్యంలోని బలమైన కథను ప్రేక్షకులకు అందించిన సుకుమార్‌.. ఈసారి ఎలాంటి ప్రపంచాన్ని సృష్టించబోతున్నారనే ఆసక్తి నెలకొంది.

అయితే సినిమా కథ, రామ్‌ చరణ్‌ పాత్ర స్వరూపం వంటి వివరాలను చిత్ర బృందం ఇంకా అధికారికంగా వెల్లడించలేదు. కాన్సెప్ట్‌ పోస్టర్‌ ఆధారంగా మాత్రమే సినిమా కథపై ఒక అంచనాకు రావడం తొందరపాటే అవుతుంది. మైత్రీ మూవీ మేకర్స్‌ ఈ భారీ చిత్రాన్ని నిర్మించనున్నారు. వచ్చే ఏడాది ఈ సినిమా చిత్రీకరణ ప్రారంభమయ్యే అవకాశం ఉంది. హీరోయిన్‌ ఎవరు? సంగీత దర్శకుడిగా ఎవరిని ఎంపిక చేస్తారు? ఇతర కీలక పాత్రల్లో ఎవరెవరు నటిస్తారు? అనే విషయాలపై ఇంకా స్పష్టత రావాల్సి ఉంది.

Comments (0)

User