Priyanka Chopra | బాలీవుడ్‌కు దూరమవుతున్నప్రియాంక చోప్రా.. ‘వారణాసి’ తర్వాత టాలీవుడ్‌లో భారీ ప్లాన్!

Priyanka Chopra | గ్లోబల్ స్టార్‌గా అంతర్జాతీయ స్థాయిలో గుర్తింపు తెచ్చుకున్న బాలీవుడ్ నటి ప్రియాంక చోప్రా జానాస్ మరోసారి భారతీయ సినీ పరిశ్రమలో తనదైన ముద్ర వేసేందుకు సిద్ధమవుతున్నారు. ముఖ్యంగా టాలీవుడ్‌లోకి ఆమె రీ ఎంట్రీ ఇప్పుడు సినీ వర్గాల్లో ఆసక్తికర చర్చకు దారితీస్తోంది. దర్శకధీరుడు ఎస్.ఎస్. రాజమౌళి, సూపర్ స్టార్ మహేష్ బాబు కాంబినేషన్‌లో తెరకెక్కుతున్న ప్రతిష్ఠాత్మక చిత్రం ‘వారణాసి’లో ప్రియాంక కీలక పాత్ర పోషిస్తున్నారు. ఈ సినిమా ద్వారా చాలా ఏళ్ల తర్వాత దక్షిణాది ప్రేక్షకుల ముందుకు రాబోతున్న ఆమె.. ఇకపై తెలుగు సినిమాల్లోనూ వరుసగా నటిస్తారా? లేక మళ్లీ హాలీవుడ్ ప్రాజెక్టులకే పరిమితమవుతారా? అన్న ప్రశ్నలు అభిమానుల్లో ఆసక్తిని పెంచుతున్నాయి.

అంతర్జాతీయ సినిమాలు, వెబ్ సిరీస్‌లతో బిజీగా ఉన్నప్పటికీ ‘వారణాసి’ వంటి భారీ ప్రాజెక్టుకు ఆమె అంగీకరించడం వెనుక కథలోని ప్రత్యేకత, రాజమౌళి దర్శకత్వ ప్రతిభ, సినిమాకు ఉన్న గ్లోబల్ స్కేల్ ప్రధాన కారణాలుగా భావిస్తున్నారు.ప్రస్తుతం ప్రియాంక చోప్రా తన కెరీర్‌ను చాలా జాగ్రత్తగా ప్లాన్ చేసుకుంటున్నారు. కేవలం స్టార్ హీరోల సినిమాలు, భారీ బడ్జెట్ ప్రాజెక్టులు అనే కోణంలో కాకుండా.. తన పాత్రకు ఎంత ప్రాధాన్యత ఉంది? కథలో తన పాత్ర ప్రభావం ఎంత? సినిమా అంతర్జాతీయ ప్రేక్షకులను ఆకట్టుకునే అవకాశం ఉందా? అనే అంశాలను పరిగణనలోకి తీసుకుంటున్నట్లు తెలుస్తోంది.ఈ నేపథ్యంలో టాలీవుడ్ నుంచి ఆమెకు మరిన్ని అవకాశాలు వచ్చే అవకాశం ఉందనే అభిప్రాయాలు వ్యక్తమవుతున్నాయి. నటనతో పాటు నిర్మాణ రంగంలోనూ ప్రియాంక చోప్రా తనదైన ముద్ర వేస్తున్నారు. తన సొంత నిర్మాణ సంస్థ పర్పుల్ పెబుల్ పిక్చర్స్ ద్వారా విభిన్నమైన కథలను ప్రేక్షకుల ముందుకు తీసుకొస్తున్నారు. ఈ క్రమంలోనే జాతీయ అవార్డు అందుకున్న మరాఠీ చిత్రం ‘వెంటిలేటర్’కు సీక్వెల్‌గా ‘వెంటిలేటర్ 2’ను ప్రకటించడం విశేషం.

ప్రియాంక కేవలం హిందీ సినిమాలకే పరిమితం కావాలనే ఆలోచనలో లేరని స్పష్టమవుతోంది. విభిన్న భాషలు, విభిన్న కథలు, విభిన్న ప్రేక్షకులను చేరుకోవాలనే లక్ష్యంతో ముందుకు సాగుతున్నట్లు ఆమె ప్రాజెక్టుల ఎంపికను బట్టి అర్థమవుతోంది.అయితే ప్రియాంక చోప్రా బాలీవుడ్‌లో మళ్లీ ఎప్పుడు నటిస్తారనే ప్రశ్న కూడా ఇప్పుడు చర్చనీయాంశంగా మారింది. ఒకప్పుడు హిందీ చిత్ర పరిశ్రమలో అగ్ర కథానాయికగా కొనసాగిన ఆమె.. ప్రస్తుతం ఎక్కువగా హాలీవుడ్, అంతర్జాతీయ ప్రాజెక్టులపైనే దృష్టి సారిస్తున్నారు. దీంతో హిందీ సినిమాల్లో ఆమె కనిపించి చాలా కాలమైందనే అభిప్రాయాలు వినిపిస్తున్నాయి.దీంతో ప్రియాంక ఇకపై బాలీవుడ్ సినిమాలకు ప్రాధాన్యత ఇవ్వడం లేదు అనే సందేహాలు వ్యక్తమవుతున్నాయి.