PM Ekta Mall | ‘పీఎం ఏక్తామాల్‌’పై వివరణ ఇవ్వండి.. యూనిటీ మాల్ అక్రమాలపై బీఆర్ఎస్ ఆందోళనతో స్పందించిన మోదీ సర్కార్

PM Ekta Mall | హైదరాబాద్‌ ఆగస్టు 21 (నమస్తే తెలంగాణ): హైదరాబాద్‌లోని రాయదుర్గం మల్కం చెరువు ఎదురుగా చేపట్టనున్న ఏక్తామాల్‌ ప్రాజెక్టుపై వివరణ ఇవ్వాలని రేవంత్‌ సర్కార్‌ను కేంద్రం ఆదేశించింది. వెంటనే ఈ ప్రాజెక్టుకు సంబంధించిన క్లియరెన్స్‌లు, వ్యయ వివరాలు సమర్పించాలని కోరింది.

ఏక్తామాల్‌ అనుమతుల్లో అక్రమాలపై ‘నమస్తే తెలంగాణ’ దినపత్రిక ముందుగా ప్రజల ముందుంచింది. దీనిలో లోపాలను పాఠకలోకానికి ఎత్తి చూపింది. ఈ క్రమంలో ప్రాజెక్టులో అక్రమాలపై విచారణ చేపట్టాలని ఈ నెల 10న బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ కేంద్రానికి లేఖ రాశారు. ఆ తర్వాత 12న బీఆర్‌ఎస్‌ ప్రతినిధుల బృందం ఆందోళనలు చేపట్టింది. ఆ తర్వాత లోకాయుక్తకు ఫిర్యాదు చేసింది. దీంతో కేంద్రం స్పందించింది. ఈ మేరకు మినిస్ట్రీ ఆఫ్‌ కామర్స్‌ అండ్‌ ఇండస్ట్రీ విభాగం డిప్యూటీ సెక్రటరీ ఆగస్టు 19న లేఖ రాశారు. ఏక్తామాల్‌కు సంబంధించిన ప్రాజెక్టు విషయంలో రాష్ట్ర ప్రభుత్వం సమర్పించిన పత్రాలు..డీపీఆర్‌లో తేడాలున్నాయని ఇందుకు వివరణ ఇవ్వడంతో పాటు అనుమానాలు నివృత్తి చేయాలని, ప్రాజెక్టు వివరాలను సమగ్రంగా నివేదించాలని ఆదేశించారు.

• ప్రాజెక్ట్‌ కాన్ఫిగరేషన్‌: అసలు 40 నుంచి 45 అంతస్తుల కాన్ఫిగరేషన్‌ చూపే ఆమోదం పొందిన డీపీఆర్‌, మంజూరైన డ్రాయింగ్‌, జీహెచ్‌ఎంసీ ప్లాన్‌ సమర్పించాలి.
• ప్రాజెక్ట్‌ వ్యయం: 2వేల కోట్ల నుంచి 3వేల కోట్ల వ్యయ అంచనాకు సంబంధించిన వివరాలను వేర్వేరుగా అందజేయండి..
• నిర్మిత ప్రాంతం..వ్యయ కేటాయింపు: టవర్ల వారీగా నిర్మిత ప్రాంతాన్ని పీఎం ఏక్తామాల్‌ ధ్రువీకరించిన వాటాను, జీహెచ్‌ఎంసీ ఫీజు, ఇతర సాధారణ ఖర్చుల వివరాలు అందించండి.
• ప్రాజెక్ట్‌ కాలపరిమితి..ఆమోదం: ట్విన్‌ టవర్స్‌, పీఎం ఏక్తామాల్‌ నిర్మాణానికి సంబంధించి చట్టబద్ధమైన క్లియరెన్స్‌లు సమర్పించండి.
• నిధుల నమూనా: ప్రాజెక్టు వ్యయానికి సంబంధించి సాస్కి (ఎస్‌ఏఎస్‌సీఐ) రూ. 202 కోట్ల సాయం, వినియోగించిన నగదు, డెవలపర్‌ పెట్టుబడి వనరుల వారీగా మ్యాపింగ్‌ చేయాలి.
• రెండో విడుత నిధులు: రెండో విడుత నిధులు రూ. 101 కోట్లకు సంబంధించి నిర్ధారణ, పనులు, కాలపరిమితితో కూడిన నిధుల వినియోగంపై వివరాలు అందించాలి.