Khammam | సన్నిహితంగా ఉండటం చూశాడని.. ప్రియుడితో కలిసి 15 ఏళ్ల బాలుడిని హత్య చేసిన మహిళ

Khammam | తమ వివాహేతర బంధం ఎక్కడ బయటపడుతుందోనని ఓ యువకుడితో కలిసి వివాహిత దారుణానికి ఒడిగట్టింది. తాము సన్నిహితంగా ఉండటం చూసిన బాలుడికి కలుపు మందు కలిపిన కూల్‌డ్రింక్ తాగించి హత్య చేసింది. ఖమ్మం జిల్లా కల్లూరు మండలం చిన్నకోరుకొండి గ్రామంలో ఈ ఘటన చోటుచేసుకుంది.

పోలీసుల కథనం ప్రకారం.. భర్తతో విడిపోయిన అపర్ణ అనే మహిళ చిన్నకోరుకొండి గ్రామంలోని తన అమ్మమ్మ ఇంట్లో నివసిస్తోంది. అదే గ్రామానికి చెందిన అజయ్ అనే యువకుడితో ఆమెకు పరిచయం ఏర్పడింది. అదికాస్త వివాహేతర సంబంధానికి దారితీసింది. ఈ క్రమంలో వీరిద్దరూ సన్నిహితంగా ఉన్న సమయంలో పదో తరగతి విద్యార్థి జిల్లెళ్ల రవి (15) చూశాడు. ఈ విషయం కుటుంబ సభ్యులకు చెబుతానని రవి హెచ్చరించడంతో ఇద్దరూ భయపడిపోయారు. దీంతో రవిని అడ్డు తొలగించుకోవాలని నిర్ణయించుకున్నారు.

ఈ క్రమంలోనే గత నెల 24న రవిని బయటకు తీసుకెళ్లి కలుపు మందు కలిపిన కూల్ డ్రింక్ తాగించారు. అది తాగిన కొద్దిసేపటికే రవి నోటిలో పొక్కులు రావడంతోపాటు చర్మంపై అలర్జీ లక్షణాలు కనిపించాయి. అనారోగ్యానికి గురైన బాలుడు ప్రశ్నించగా.. కూల్‌డ్రింక్‌లో విషం కలిపినట్లు నిందితులు చెప్పారు. దీంతో భయపడిన రవి వెంటనే తన తండ్రికి, బంధువులకు విషయం చెప్పాడు. కుటుంబ సభ్యులు తొలుత ఖమ్మం ప్రభుత్వ ఆస్పత్రికి తరలించి చికిత్స అందించారు. పరిస్థితి విషమించడంతో వరంగల్‌లోని ఎంజీఎం ఆస్పత్రికి తరలించారు. అక్కడ చికిత్స పొందుతూ ఆదివారం రవి మృతి చెందాడు. బాలుడి బంధువుల ఫిర్యాదుతో కేసు నమోదు చేసిన పోలీసులు అపర్ణ, అజయ్‌లను అరెస్ట్ చేసి రిమాండ్‌కు తరలించారు.