Jayannth & The Jingo Pen | దిల్ రాజు చేతుల మీదుగా ‘జయంత్ అండ్ ది జింగో పెన్’ నుంచి ‘నా కనుపాపే’ సాంగ్ విడుదల

Naa Kanupaape | నమో జయం ప్రొడక్షన్స్ బ్యానర్‌పై దివ్య ప్రవీణ్ బొలిశెట్టి నిర్మాణంలో జాతీయ అవార్డు గ్రహీత నవీన్ దేశబోయిన తెరకెక్కించిన చిత్రం ‘జయంత్ అండ్ ది జింగో పెన్’. ఈ సినిమాలో మాస్టర్ జయంత్ బొలిశెట్టి, మన శంకర వర ప్రసాద్ ఫేమ్ ఊహా రెడ్డి, సత్యం రాజేష్, ఆశిష్ గాంధీ, మానస రాధాకృష్ణన్, తనికెళ్ల భరణి, కాశీ విశ్వనాథ్, మానిక్ రెడ్డి, అశోక్ కుమార్, శ్రీకాంత్ రెడ్డి తదితరులు ముఖ్య పాత్రలు పోషించారు. బాలల దినోత్సవం సందర్భంగా నవంబర్ 14న ఈ చిత్రాన్ని గ్రాండ్‌గా విడుదల చేయనున్నారు. ఈ నేపథ్యంలో చిత్ర యూనిట్ తాజాగా ఈ సినిమా నుంచి మరో భావోద్వేగభరితమైన పాటను విడుదల చేసింది.

ప్రముఖ నిర్మాత దిల్ రాజు ఈ చిత్రంలోని ‘నా కనుపాపే’ అంటూ సాగే ఎమోషనల్ సాంగ్‌ను లాంచ్ చేశారు. పాటను విడుదల చేసిన అనంతరం ఆయన చిత్ర యూనిట్‌కి అల్ ది బెస్ట్ తెలిపారు. ప్రవీణ్ బొలిశెట్టి అందించిన బాణీ, సాహిత్యం ఈ పాటకు ప్రధాన ఆకర్షణగా నిలిచాయి. మోహిత్ కులకర్ణి సంగీతం, చిన్మయి శ్రీపాద గాత్రం అందరినీ హత్తుకునేలా ఉన్నాయి. పిల్లలు, తల్లిదండ్రుల మధ్య ఉండాల్సిన బంధాన్ని ఈ పాట ఎంతో చక్కగా కళ్ళకు కట్టింది.

పిల్లలు, పేరెంట్స్, టీచర్స్ ఇలా అందరూ తప్పకుండా చూడాల్సిన చిత్రమిది. విద్యార్థుల్లో చూడాల్సింది మార్కులు కాదు.. వారి మనసులు అనే గొప్ప సందేశాన్ని ఈ సినిమా ద్వారా అందిస్తున్నారు. అందరిలోనూ స్ఫూర్తినింపేలా తెరకెక్కిన ఈ చిత్రం బాలల దినోత్సవం కానుకగా నవంబర్ 14న భారీ ఎత్తున ప్రేక్షకుల ముందుకు రానుంది.