Ganapati Puja At Police Station | పోలీస్ స్టేషన్‌లో హోమం.. రేకెత్తించిన రాజకీయ వివాదం

21 November 2026 - 21:09
0 0
Ganapati Puja At Police Station | పోలీస్ స్టేషన్‌లో హోమం.. రేకెత్తించిన రాజకీయ వివాదం
Ganapati Puja At Tamil Nadu

చెన్నై: బాలిక మిస్సింగ్ కేసుపై ఒత్తిడి, ప్రమాదం వంటి అవాంఛనీయ సంఘటనలకు ఒక పోలీస్‌ అధికారి కలత చెందారు. ఈ నేపథ్యంలో కొందరి సలహా మేరకు ఏకంగా ఆ పోలీస్‌ స్టేషన్‌లో హోమం నిర్వహించారు. దీంతో రాజకీయ వివాదానికి ఇది దారితీసింది. (Ganapati Puja At Police Station) తమిళనాడులోని విల్లుపురం జిల్లాలో ఈ సంఘటన జరిగింది. నడుపట్టు గ్రామానికి చెందిన రెండో తరగతి చదువుతున్న బాలిక రెండు నెలల కిందట ఇంటి నుంచి అదృశ్యమైంది. ఆ చిన్నారి తల్లిదండ్రులు సత్యమంగళం పోలీస్ స్టేషన్‌లో ఫిర్యాదు చేశారు. పోలీసులు కేసు నమెదు చేసి ఆ బాలిక కోసం వెతికినా ఎలాంటి ప్రయోజనం లేకపోయింది. దీంతో ఈ కేసును సీబీ-సీఐడీకి బదిలీ చేశారు.

కాగా. సత్యమంగళం పోలీస్‌ స్టేషన్‌కు చెందిన ఇన్‌స్పెక్టర్ సురేష్ బాబు ఇటీవల ప్రమాదానికి గురయ్యారు. బాలిక మిస్సింగ్‌ కేసుతో పాటు గత నెల రోజులుగా ఆ పోలీస్ స్టేషన్ పరిధిలో మరికొన్ని కేసులతో పాటు   అవాంఛనీయ సంఘటనలు కూడా జరిగాయి. ఈ నేపథ్యంలో ఎవరో ఇచ్చిన సలహా మేరకు ఇన్‌స్పెక్టర్ సురేష్ బాబు ఏకంగా ఆ పోలీస్‌ స్టేషన్‌లో తన భార్యతో కలిసి గణపతి హోమం నిర్వహించారు. పోలీస్‌ సిబ్బంది, పోలీస్‌ అధికారులు కూడా ఈ పూజలో పాల్గొన్నారు. ఈ వీడియో క్లిప్‌ సోషల్‌ మీడియాలో వైరల్‌ అయ్యింది.

మరోవైపు ఈ సంఘటన తమిళనాడులో రాజకీయ వివాదానికి దారితీసింది. సీఎం విజయ్‌ నేతృత్వంలోని టీవీకే ప్రభుత్వాన్ని డీఎంకే నాయకుడు సెంథిల్‌కుమార్ విమర్శించారు. ‘జ్యోతిష్యుల సలహాల ఆధారంగా పనిచేస్తుందని ఆరోపణలు ఎదుర్కొంటున్న ఈ ప్రభుత్వం నుంచి ఏమి ఆశించగలం’ అని ఆయన ప్రశ్నించారు.

అయితే ఈ సంఘటనపై పోలీస్‌ ఉన్నతాధికారులు స్పందించారు. పోలీస్ స్టేషన్ లోపల ఎలాంటి మతపరమైన కార్యక్రమాలు నిర్వహించడానికి అనుమతి లేదని స్పష్టం చేశారు. దీనిపై విచారణ జరుపుతున్నామని, సదరు ఇన్‌స్పెక్టర్‌పై చర్యలు తీసుకుంటామని పోలీస్‌ ఉన్నతాధికారి తెలిపారు.

 

 

Comments (0)

User