Chiranjeevi | మెగా 158 గ్లింప్స్ వ‌చ్చేసింది.. కాకా టైటిల్‌తో మెగాస్టార్ విధ్యంసం

Chiranjeevi | మెగాస్టార్ చిరంజీవి అభిమానులు ఎప్పటినుంచో ఎదురుచూస్తున్న బర్త్‌డే ట్రీట్ వచ్చేసింది. చిరంజీవి హీరోగా నటిస్తున్న లేటెస్ట్ మూవీ మెగా 158 టైటిల్‌తో పాటు రిలీజ్ డేట్‌ను మేకర్స్ అధికారికంగా ప్రకటించారు. చిరంజీవి పుట్టినరోజు సందర్భంగా శనివారం ఈ సినిమాకు సంబంధించిన టైటిల్ గ్లింప్స్‌ను విడుదల చేశారు. అభిమానులు ఊహించినట్టుగానే ఈ చిత్రానికి ‘కాకా’ అనే పవర్‌ఫుల్ టైటిల్‌ను ఖరారు చేశారు. టైటిల్‌ను ప్రకటించడంతో పాటు సుమారు మూడు నిమిషాలకు పైగా ఉన్న పవర్‌ఫుల్ గ్లింప్స్‌ను మేకర్స్ విడుదల చేశారు. ఇందులో చిరంజీవి ఎంతో స్టైలిష్‌గా, మాస్ లుక్‌లో కనిపించారు. గ్యాంగ్‌స్టర్ బ్యాక్‌డ్రాప్‌లో సాగే కథగా ఈ సినిమా ఉండబోతున్నట్లు గ్లింప్స్ ద్వారా స్పష్టమైన సంకేతాలు ఇచ్చారు.స్టైలిష్ యాక్షన్, మాస్ ఎలిమెంట్స్, పవర్‌ఫుల్ డైలాగ్స్‌తో రూపొందిన గ్లింప్స్ మెగా అభిమానులను ఆకట్టుకుంటోంది. చిరంజీవిని ఆయనకు సరిగ్గా సరిపోయే మాస్ క్యారెక్టర్‌లో చూపించేందుకు దర్శకుడు బాబీ కొల్లి భారీగా ప్లాన్ చేసినట్లు తెలుస్తోంది.

టైటిల్‌తో పాటు సినిమా రిలీజ్ డేట్‌ను కూడా మేకర్స్ అధికారికంగా ప్రకటించారు. 2027 సంక్రాంతి కానుకగా జనవరి 13న ‘కాకా’ సినిమాను ప్రపంచవ్యాప్తంగా విడుదల చేయనున్నట్లు వెల్లడించారు. దీంతో వచ్చే సంక్రాంతి బరిలో మెగాస్టార్ సినిమా కూడా నిలవనుంది.‘కాకా’ సినిమాకు బాబీ కొల్లి (కేఎస్ రవీంద్ర) దర్శకత్వం వహిస్తున్నారు. గతంలో చిరంజీవి, బాబీ కాంబినేషన్‌లో వచ్చిన ‘వాల్తేరు వీరయ్య’ బాక్సాఫీస్ వద్ద భారీ విజయాన్ని అందుకున్న సంగతి తెలిసిందే. ఈ చిత్రం రూ.200 కోట్లకు పైగా వసూళ్లు సాధించి మెగాస్టార్ కెరీర్‌లో ప్రత్యేక చిత్రంగా నిలిచింది.ఇప్పుడు అదే కాంబినేషన్ మరోసారి రిపీట్ కావడంతో ‘కాకా’పై అంచనాలు భారీగా పెరిగాయి. ఈసారి కూడా చిరంజీవి ఇమేజ్‌కు తగ్గట్టుగా పక్కా కమర్షియల్ అంశాలు, యాక్షన్, ఎమోషన్‌తో కూడిన కథను బాబీ సిద్ధం చేసినట్లు తెలుస్తోంది.

ఈ సినిమాలో మలయాళ నటి అనస్వర రాజన్ కీలక పాత్రలో నటిస్తున్నారు. అలాగే ప్రియమణి, బండ్ల గణేష్ తదితరులు ముఖ్య పాత్రలు పోషిస్తున్నారు. మెగాస్టార్‌తో పాటు ఇతర పాత్రలకు కూడా కథలో ప్రాధాన్యత ఉండేలా స్క్రిప్ట్‌ను రూపొందించినట్లు సమాచారం.సినిమాకు ఎస్.ఎస్. థమన్ సంగీతం అందిస్తున్నారు. గ్యాంగ్‌స్టర్ కథాంశానికి తగ్గట్టుగా మాస్ బీజీఎం, పవర్‌ఫుల్ సాంగ్స్‌తో థమన్ మరోసారి తన మార్క్ చూపించనున్నారని అభిమానులు ఆశిస్తున్నారు. చిత్రంలో చిరు రెండు విభిన్న పాత్ర‌ల‌లో క‌నిపించ‌నున్న‌ట్టు గ్లింప్స్‌ని బ‌ట్టి చేస్తుంది. మ‌ధ్య వ‌య‌స్కుడైన స‌త్యం రూపంలో హుందాగా క‌నిపించిన చిరు చివ‌రలో యంగ్ అండ్ స్టైలిష్ లుక్‌లో కేక పెట్టించారు. గ్లింప్స్ మాత్రం ఓ రేంజ్‌లో ఉంద‌ని ఫ్యాన్స్ కామెంట్స్ చేస్తున్నారు. ప్రస్తుతం ‘కాకా’ షూటింగ్ కూడా శరవేగంగా కొనసాగుతోంది. ఇప్పటికే సినిమా చిత్రీకరణలో దాదాపు సగం భాగం పూర్తయినట్లు సమాచారం. మిగిలిన షూటింగ్‌ను కూడా త్వరగా పూర్తి చేసి, పోస్ట్ ప్రొడక్షన్ పనులను కంప్లీట్ చేసి సంక్రాంతి బరిలో సినిమాను ప్రేక్షకుల ముందుకు తీసుకురావాలని మేకర్స్ ప్లాన్ చేస్తున్నారు.