Bulgaria Accident | పొగ‌మంచు ఎఫెక్ట్‌.. ఒక‌దానినొక‌టి ఢీకొన్న 86 వాహ‌నాలు.. 12 మంది మృతి

Bulgaria Accident : దట్టమైన పొగమంచు (Fog) కారణంగా ఒకే కూడ‌లిలో 86 వాహనాలు ఒక‌దానినొక‌టి ఢీకొన్నాయి. ఈ ప్ర‌మాదంలో 12 మంది మృతిచెందారు. ప‌లువురు గాయ‌ప‌డ్డారు. బల్గేరియా (Bulgaria) లో ఈ దుర్ఘటన చోటుచేసుకుంది. దేశ రాజధాని సోఫియా (Sofia) ను బుర్గాస్ ఓడరేవు (Burgas port) తో కలిపే రోడ్డుపై మంగళవారం ఉదయం దట్టమైన పొగమంచు కమ్ముకుంది. ఈ క్రమంలోనే యాంబోల్‌ సమీపంలో ఒకే ప్రదేశంలో అటు, ఇటు ఉన్న రోడ్లపై దాదాపు 86 వాహనాలు ఒకదానికొకటి ఢీకొన్నాయి. ఇందులో చాలావరకు ట్రక్కులే ఉన్నాయి.

ఈ ప్ర‌మాదం కార‌ణంగా ఘటనా స్థలంలోనే 10 మంది మృతిచెందారు. ఆసుపత్రికి తరలిస్తుండగా మరో ఇద్దరు ప్రాణాలు కోల్పోయారు. మరో 46 మందిని చికిత్స కోసం తరలించారు. సమాచారం అందుకున్న ప్రధాని రుమెన్ రాదేవ్ ఘటనా స్థలానికి చేరుకుని సహాయక చర్యలను పరిశీలించారు. ఇలాంటి భయానక దృశ్యాన్ని తాను ఎన్నడూ చూడలేదని ప్రాంతీయ గవర్నర్ మిహైల్ కాషెరోవ్ చెప్పారు. దట్టమైన పొగమంచు కారణంగా దారి సరిగ్గా కనిపించకపోవడం, రోడ్డు తడిగా ఉండటం వంటివి ప్రమాదానికి దారితీసినట్లు పోలీసులు ప్రాథమికంగా అంచనా వేశారు.