Bigg Boss 10 | బిగ్‌బాస్‌ తెలుగు 10లో హైడ్రామా.. ఐదో వారం నామినేషన్లలో రచ్చ రచ్చ, టార్గెట్‌గా రోహిత్‌, ముఖేష్‌

Bigg Boss 10 | బిగ్‌బాస్‌ తెలుగు 10లో ఐదో వారం నామినేషన్ల ప్రక్రియ హాట్‌హాట్‌గా సాగుతోంది. సోమవారం ప్రారంభమైన నామినేషన్ల ప్రక్రియ మంగళవారం ఎపిసోడ్‌లోనూ కొనసాగింది. కంటెస్టెంట్లు ఒకరిపై ఒకరు ఆరోపణలు చేసుకోవడం, వాటికి కౌంటర్లు ఇవ్వడంతో హౌస్‌లో ఒక్కసారిగా వాతావరణం వేడెక్కింది. ముఖ్యంగా రోహిత్‌, ముఖేష్‌ గౌడ, షాలిని, అమన్‌, ఝాన్సీ తదితరుల మధ్య జరిగిన వాదోపవాదాలు ఎపిసోడ్‌కు హైలైట్‌గా నిలిచాయి. మంగళవారం ఎపిసోడ్‌లో మొదట కుండను దక్కించుకున్న సుధీర్‌ రెడ్డి.. రోహిత్‌ను నామినేట్‌ చేశాడు. రోహిత్‌ హీరోలా పోజులు కొడుతున్నాడని, ఇతరులకు సరైన గౌరవం ఇవ్వడం లేదని, యాటిట్యూడ్‌ చూపిస్తున్నాడని సుధీర్‌ ఆరోపించాడు. ఈ వ్యాఖ్యలపై రోహిత్‌ తీవ్రంగా స్పందించడంతో ఇద్దరి మధ్య మాటల యుద్ధం జరిగింది.

రోహిత్‌పై సుధీర్‌ వేసిన సెటైర్లకు హౌస్‌లోని కొందరు కంటెస్టెంట్లు నవ్వడంతో రోహిత్‌ కూడా ఘాటుగా స్పందించాడు. తాను స్టాండప్‌ కామెడీ చేయడం లేదంటూ సుధీర్‌కు కౌంటర్‌ ఇచ్చాడు. దీంతో వీరిద్దరి మధ్య నామినేషన్‌ ప్రక్రియ కాస్త వ్యక్తిగత వాగ్వాదం దిశగా వెళ్లింది.ఆ తర్వాత సుధీర్‌ రెడ్డి షాలినిని నామినేట్‌ చేశాడు. షాలిని నుంచి తాను మరింత స్ట్రాంగ్‌ గేమ్‌ను ఆశించానని, ఆమె పులిలా ఆడుతుందని అనుకున్నానని, కానీ ప్రస్తుతం కొంత నీరసంగా కనిపిస్తోందని చెప్పాడు. మళ్లీ బలంగా ఆడాలనే ఉద్దేశంతోనే ఆమెను నామినేట్‌ చేస్తున్నట్టు వివరించాడు.

అయితే సుధీర్‌ వ్యాఖ్యలను షాలిని అంగీకరించలేదు. తన గేమ్‌పై అతడు చేసిన కామెంట్లకు ఆమె గట్టిగానే కౌంటర్‌ ఇచ్చింది. దీంతో ఇద్దరి మధ్య వాగ్వాదం చోటుచేసుకుంది. ఈ సమయంలో టెంపర్‌ వంశీ కూడా స్పందించడంతో పరిస్థితి మరింత వేడెక్కింది. అటు వంశీ, ఇటు షాలిని తమ వాదనలను గట్టిగా వినిపించడంతో కొద్దిసేపు హౌస్‌లో హైటెన్షన్‌ వాతావరణం కనిపించింది. చరణ్‌.. ముఖేష్‌ గౌడను నామినేట్‌ చేస్తూ కీలక వ్యాఖ్యలు చేశాడు. హౌస్‌లో స్టార్‌ అయినా, కామనర్‌ అయినా అందరూ సమానమేనని చెప్పాడు. కామనర్స్‌ను తక్కువ చేసి మాట్లాడటం సరికాదని, అందరూ ఒకే స్థాయిలో గేమ్‌ ఆడుతున్నారని పేర్కొన్నాడు. కామనర్‌గా వచ్చినవాళ్లు సులభంగా హౌస్‌లోకి వచ్చారని భావించడం తప్పని చరణ్‌ అన్నాడు. తన యాటిట్యూడ్‌ను మార్చుకోవాలని ముఖేష్‌కు సూచించాడు. దీనికి ముఖేష్‌ కూడా వ్యంగ్యంగా స్పందించాడు. ‘‘చాలా గొప్పగా, మెచ్యూర్‌గా చెప్పావు. నీలా ఆలోచించడం నాకు రాదు. నేను నేర్చుకుంటాను’’ అంటూ చరణ్‌కు కౌంటర్‌ ఇచ్చాడు.

కుండను దక్కించుకున్న అపూర్వ.. ముఖేష్‌ గౌడను నామినేట్‌ చేస్తూ ఘాటు వ్యాఖ్యలు చేసింది. పులి వేషం వేసుకున్న గుంటనక్కలా ముఖేష్‌ వ్యవహరిస్తున్నాడని ఆరోపించింది. తన క్యారెక్టర్‌ను అసాసినేట్‌ చేశాడంటూ మండిపడింది. దీనికి ముఖేష్‌ కూడా వెనక్కి తగ్గలేదు. ‘‘నేను నక్కను కాదా? మరి నాతో ఎందుకు సహవాసం చేశావు?’’ అంటూ అపూర్వను ప్రశ్నించాడు. ఒక టీమ్‌లో ఉంటూనే మరో టీమ్‌లో పావులు కదుపుతున్నావంటూ అపూర్వ.. ముఖేష్‌పై ఆరోపణలు చేసింది. దీంతో ఇద్దరి మధ్య తీవ్ర స్థాయిలో వాగ్వాదం జరిగింది.

అదే సమయంలో అపూర్వ.. సింగర్‌ ఝాన్సీని కూడా నామినేట్‌ చేసింది. డాగర్ల విషయంలో ఝాన్సీ స్వార్థంగా గేమ్‌ ఆడిందని ఆరోపించింది. తన కోసం కాకుండా ఇతరుల కోసం ఆడుతోందని పేర్కొంది. ఈ క్రమంలో రోహిత్‌, సుధీర్‌ల పేర్లు ప్రస్తావనకు రావడంతో పలువురు కంటెస్టెంట్లు చర్చలోకి వచ్చారు. దీంతో మరోసారి హౌస్‌లో వాతావరణం వేడెక్కింది. జబర్దస్త్‌ నరేష్‌.. చరణ్‌ను నామినేట్‌ చేస్తూ అతడి గేమ్‌ను ప్రశ్నించాడు. మిథిలేష్‌ రెండు రోజుల్లో రూ.15 లక్షలు తీసుకెళ్లాడని చరణ్‌ ప్రశంసించాడని, మరి నాలుగు వారాలుగా హౌస్‌లో ఉన్న చరణ్‌ ఏం చేస్తున్నాడని ప్రశ్నించాడు.

అంతేకాకుండా చరణ్‌ కామనర్‌గా సులభంగా హౌస్‌లోకి రాలేదని, ఎంతో మందిని దాటి వచ్చాడని నరేష్‌ చెప్పాడు. అయితే చరణ్‌ కంటే మెరుగైన వాళ్లు వచ్చి ఉంటే బాగుండేదని వ్యాఖ్యానించాడు. దీనికి చరణ్‌ కూడా గట్టిగానే స్పందించాడు. ప్రజలకు సంబంధించిన విషయాలు మీకు అవసరం లేదంటూ నరేష్‌కు కౌంటర్‌ ఇచ్చాడు. మీరు ఏం ఆడుతున్నారంటూ రివర్స్‌ ఎటాక్‌ చేశాడు. ఈ వాదనలో రామ్‌ ప్రసాద్‌, షాలిని కూడా జోక్యం చేసుకోవడంతో పరిస్థితి మరింత హీట్‌ ఎక్కింది. మ‌రోవైపు సింగర్‌ ఝాన్సీ కూడా రోహిత్‌ను నామినేట్‌ చేసింది. రోహిత్‌ ప్రవర్తనను ఆమె తప్పుబట్టింది. అయితే తన ఆట గురించి పాయింట్‌ అవుట్‌ చేసే ముందు ఝాన్సీ తన ఆట గురించి ఆలోచించుకోవాలని రోహిత్‌ కౌంటర్‌ ఇచ్చాడు.

ఆ తర్వాత ఝాన్సీ.. అమన్‌ను నామినేట్‌ చేసింది. ఆటను ఆటగాడిలా ఆడాలని, పోటుగాడిలా కాదంటూ అమన్‌ చేసిన వ్యాఖ్యలను ప్రస్తావించింది. ‘పిల్ల బచ్చగాడు’ అంటూ చేసిన కామెంట్లను కూడా ఆమె ప్రశ్నించింది. తాను అన్నది తప్పు అయితే, అమన్‌ అన్నది ఏమిటని నిలదీసింది.దీంతో ఝాన్సీ, అమన్‌ మధ్య కూడా వాగ్వాదం జరిగింది. ఒక దశలో అమన్‌ ఝాన్సీ మీదకు రావడంతో ఇతర కంటెస్టెంట్లు ఇద్దరినీ ఆపే ప్రయత్నం చేశారు. ఈ గొడవతో నామినేషన్ల ప్రక్రియ మరింత ఉత్కంఠగా మారింది.

మంగళవారం ఎపిసోడ్‌ ముగిసే సమయానికి ఐదో వారానికి సంబంధించి మొత్తం 10 మంది కంటెస్టెంట్లు నామినేషన్‌లో ఉన్నారు. అమన్‌, అపూర్వ, ముఖేష్‌ గౌడ, రోహిత్‌, సింగర్‌ ఝాన్సీ, చరణ్‌, నరేష్‌, షాలిని, రామ్‌ ప్రసాద్‌, త్రిగుణ్‌ ఈ వారం ఎలిమినేషన్‌ రేసులో నిలిచారు.