AP News | శ్రీకాళ‌హ‌స్తి ప్ర‌సాద కేంద్రంలో అగ్నిప్ర‌మాదం.. నిలిచిన ప్ర‌సాదాల త‌యారీ..!

AP News : ఆంధ్ర‌ప్ర‌దేశ్ రాష్ట్రం తిరుపతి జిల్లా శ్రీకాళహస్తి ఆలయంలోని ప్రసాదాల‌ త‌యారీ కేంద్రంలో అగ్నిప్రమాదం చోటుచేసుకుంది. దక్షిణ గోపురం పక్కనున్న‌ ప్రసాదాల తయారీ కేంద్రంలో గ్యాస్ లీక్ కావడ‌మే ప్ర‌మాదానికి కార‌ణంగా తెలుస్తున్న‌ది. స్వామివారికి లడ్డూ ప్రసాదాలతోపాటు వడలు, అన్నప్రసాదాలు తయారు చేస్తుండగా ఒక్కసారిగా మంటలు చెలరేగాయి. సమాచారం అందుకున్న అగ్నిమాపక సిబ్బంది ఘటనాస్థలికి చేరుకుని మంటలను అదుపుచేసేందుకు చర్యలు చేపట్టారు.

ఈ ప్రమాదం కారణంగా చుట్టూ మండపాల్లో ఉన్న భక్తులకు ఇబ్బందులు తలెత్తకుండా విద్యుత్ సరఫరాను నిలిపివేశారు. ఆలయ ఈవో వెంకటేశులు, ఛైర్మన్ కొట్టే సాయి ప్రసాద్ ప్రసాదాల తయారీ కేంద్రాన్ని పరిశీలించారు. ప్రస్తుతానికి ప్రసాదాల తయారీని నిలిపివేసి, అక్కడ అవసరమైన భద్రతా ఏర్పాట్లు చేపట్టారు.