Anna Konidala | పవన్ కల్యాణ్, అన్నా కొణిదెల విడాకులు.. ఇన్‌స్టాగ్రామ్ ఖాతాను డియాక్టివేట్ చేసిన అన్నా

ఆంధ్రప్రదేశ్ ఉప ముఖ్యమంత్రి, ప్రముఖ నటుడు పవన్ కల్యాణ్ దంపతులు విడిపోతున్నట్లు ప్రకటించిన నేపథ్యంలో, ఆయన సతీమణి అన్నా కొణిదెల తన ఇన్‌స్టాగ్రామ్ ఖాతాను డియాక్టివేట్ చేశారు. దాదాపు 13 ఏళ్ల వైవాహిక జీవితానికి స్వస్తి పలకాలని ఇద్దరూ పరస్పర అంగీకారంతో నిర్ణయించుకున్నట్లు సోమవారం రాత్రి సంయుక్త ప్రకటన విడుదల చేసిన సంగ‌తి తెలిసిందే. జీవితంలో ఎన్నో కీలక నిర్ణయాలు క‌లిసి పంచుకున్నామని, తమ పిల్లల సంక్షేమం కోసం మంచి స్నేహితులుగా, బాధ్యతగల తల్లిదండ్రులుగా కొనసాగుతామని ఆ ప్రకటనలో పేర్కొన్నారు. ఈ వ్యక్తిగత పరిణామం నేపథ్యంలో ఎవరూ తమ గోప్యతకు భంగం కలిగించవద్దని వారు కోరారు. పవన్ కల్యాణ్‌ను వివాహం చేసుకున్న తర్వాత అన్నా కొణిదెల తన పేరును మార్చుకోవడం, ఆయన సర్జరీ సమయంలో హెల్త్ అప్‌డేట్స్ పంచుకోవడం వంటి పోస్టులతో కొద్దికాలంగా ఇన్‌స్టాగ్రామ్‌లో యాక్టివ్‌గా ఉన్నారు.

ఇక విడాకుల ప్రకటన వెలువడిన వెంటనే ఆమె తన ఖాతాను డీయాక్టివేట్ చేయడం గమనార్హం. ఇది పవన్ కల్యాణ్‌కు మూడో వివాహం కావడం విశేషం. పవన్ కల్యాణ్ గతంలో 1997లో నందినిని వివాహం చేసుకోగా 2008లో విడాకులు తీసుకున్నారు. ఆ తర్వాత 2009లో నటి రేణు దేశాయ్‌ను వివాహం చేసుకోగా, వీరికి అకీరా నందన్, ఆద్య సంతానం. మనస్పర్థల కారణంగా 2012లో రేణు దేశాయ్‌కు కూడా విడాకులు ఇచ్చారు. అనంతరం 2011లో వచ్చిన ‘తీన్ మార్’ సినిమా షూటింగ్ సమయంలో అన్నా లెజ్‌నేవా (అన్నా కొణిదెల)తో పరిచయం ఏర్పడగా, 2013లో ఆమెను మూడో వివాహం చేసుకున్నారు. ఈ దంపతులకు పోలెన అంజనా పవనోవ, మార్ శంకర్ పవనోవిచ్ అనే ఇద్దరు పిల్లలు ఉన్నారు.